ທາງຫຼວງເລກ 1577 ເຊິ່ງເປັນເສັ້ນທາງຄົມມະນາຄົມທີ່ສຳຄັນຢູ່ພາກຕາເວັນຕົກສຽງເໜືອຂອງກຳປູເຈຍ ທີ່ຈີນຊ່ວຍເຫຼືອກໍ່ສ້າງນັ້ນ ໄດ້ເລີ່ມເປີດນຳໃຊ້ຢ່າງເປັນທາງການແລ້ວໃນວັນທີ 2 ເມສານີ້ ໂດຍມີຈຸດເລີ່ມຕົ້ນຢູ່ທາງຫຼວງເລກ 57 ແຂວງບັດຕຳບອງ ແລະໄປຮອດດ່ານຊາຍແດນເລກ 400 ທີ່ຕິດກັບໄທ ຍາວທັງໝົດເກືອບ 52 ກິໂລແມັດ.
ທ່ານຊາເຄັງ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງພາຍໃນກຳປູເຈຍ ໄດ້ກ່າວໃນພິທີເປີດວ່າ: ຂໍຂອບໃຈນຳລັດຖະບານແລະປະຊາຊົນຈີນທີ່ໄດ້ໃຫ້ການຊ່ວຍເຫຼືອອັນລ້ຳຄ່າແກ່ປະເທດຕົນ ເຊິ່ງການຊ່ວຍເຫຼືອຈາກຈີນໄດ້ເປັນການຊຸກຍູ້ການພັດທະນາເສດຖະກິດຂອງກຳປູເຈຍ. ມາຮອດປັດຈຸບັນ, ໂດຍຈາກການຊ່ວຍເຫຼືອ ແລະ ເງິນກູ້ພິເສດຂອງຈີນ ພາຍໃນປະເທດກຳປູເຈຍໄດ້ສ້າງທາງຫຼວງສຳເລັດແລ້ວ 23 ເສັ້ນ, ຍາວ 2.301 ກິໂລແມັດ ແລະນຳໃຊ້ງົບປະມານ 1 ຕື້ 300 ລ້ານໂດລາສະຫະລັດ ນອກນີ້ຍັງມີທາງຫຼວງອີກ 6 ເສັ້ນພວມກໍ່ສ້າງຢູ່, ຍາວ 600 ກິໂລແມັດ ແລະນຳໃຊ້ງົບປະມານ 490 ລ້ານໂດລາສະຫະລັດ.
ທ່ານຊາເຄັງ ຍັງກ່າວຕື່ມວ່າ: ຂົວ 7 ແຫ່ງໃນປະເທດຕົນທີ່ຈີນຊ່ວຍເຫຼືອກໍ່ສ້າງນັ້ນ ໄດ້ສ້າງສຳເລັດແລ້ວ ເຊິ່ງທັງໝົດຍາວ 6.824 ແມັດ ແລະນຳໃຊ້ງົບປະມານ 216 ລ້ານໂດລາສະຫະລັດ.
