ເວທີປຶກສາຫາລືອາຊີໂປອາວສາມາດຊຸກຍູ້ວິໄສທັດຮ່ວມຂອງອາຊີໃນສະຕະວັດນີ້ຢ່າງແຂງແຮງ
ຕາມຂ່າວCRI: ກ່ອນຈະມາເຂົ້າຮ່ວມກອງປະຊຸມປະຈຳປີຂອງເວທີປຶກສາຫາລືອາຊີໂປອາວ 2018 ຢູ່ຈີນ, ວັນທີ 3 ເມສານີ້, ທ່ານ ຊາຮິດ ຄາການ ອັບບາຊີ ນາຍົກລັດຖະມົນຕີປາກິສະຖານໄດ້ໃຫ້ສຳພາດຮ່ວມຕໍ່ສື່ມວນຊົນຈີນປະຈຳປາກິສະຖານຢູ່ນະຄອນຫຼວງອິສລາມາບັດວ່າ: ໃນຖານະເປັນໜຶ່ງໃນປະເທດສະມາຊິກຜູ້ກໍ່ຕັ້ງເວທີປຶກສາຫາລືອາຊີໂປອາວ 26 ປະເທດ, ປາກິສະຖານໄດ້ໃຫ້ຄວາມສຳຄັນຢ່າງສູງຕໍ່ການພັດທະນາຂອງເວທີປຶກສາຫາລືອາຊີໂປອາວ, ແລະຫວັງວ່າເວທີປຶກສາຫາລືຄັ້ງນີ້ຈະສາມາດຊຸກຍູ້ວິໄສທັດ
ຮ່ວມຂອງອາຊີໃນສະຕະວັດນີ້ຢ່າງແຂງແຮງ.
ທ່ານ ອັບບາຊີ ກ່າວວ່າ: ໃນຊຸມປີຜ່ານມາ, ບັນດາປະເທດໃນອາຊີໄດ້ຂະຫຍາຍການພົວພັນຄູ່ຮ່ວມມືກັນຢ່າງເລິກເຊິ່ງໃນຂົງເຂດຕ່າງໆຢ່າງບໍ່ຢຸດຢັ້ງເຊັ່ນ: ຂົງເຂດເສດຖະກິດ, ການຄ້າ, ເຕັກໂນໂລຊີ, ພະລັງງານ, ຊີວະຊາດແລະສັງຄົມເປັນຕົ້ນ, ການເປີດປະຕູສູ່ພາຍນອກແລະການກວມລວມໄດ້ກາຍເປັນຄວາມຕ້ອງການແຫ່ງຍຸກໃໝ່ໃນປັດຈຸບັນ. ເວທີປຶກສາຫາລືອາຊີໂປອາວນັບມື້ນັບມີຄວາມສຳຄັນຫຼາຍຂຶ້ນກວ່າເກົ່າ ເຊິ່ງໄດ້ສະໜອງໂອກາດການແລກປ່ຽນທີ່ດີໃຫ້ແກ່ການເຊື່ອມຈອດກັນແລະການພັດທະນາຮ່ວມກັນລະຫວ່າງບັນດາປະເທດ.
ທ່ານ ອັບບາຊີ ກ່າວວ່າ: ເລື່ອງຈິງທີ່ 60 ກວ່າປະເທດ ແລະ 100 ອົງການຈັດຕັ້ງພວມເຂົ້າຮ່ວມຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ໄດ້ຢັ້ງຢືນວ່າ: ຂໍ້ລິເລີ່ມທີ່ຍິ່ງໃຫຍ່ດັ່ງກ່າວພວມຊຸກຍູ້ການເຊື່ອມຈອດກັນລະຫວ່າງບັນດາປະເທດຢ່າງບໍ່ຢຸດຢັ້ງ ຂະນະດຽວກັນກໍ່ໄດ້ຮັດແໜ້ນການພົວພັນລະຫວ່າງບັນດາເຂດແຄວ້ນໃຫ້ມີຄວາມໃກ້ຊິດກວ່າເກົ່າ.