ວັນທີ 4 ເມສານີ້, ທ່ານຈູ່ກ່ວງຢ້າວ ຮອງລັດຖະມົນຕີກະຊວງການເງິນຈີນກ່າວຢູ່ນະຄອນຫຼວງປັກກິ່ງວ່າ, ການສົ່ງອອກຖົ່ວເຫຼືອງຕໍ່ຈີນຂອງອາເມລິກາໄດ້ກວມເຖິງ 62% ຂອງຍອດປະລິມານສົ່ງອອກຖົ່ວເຫຼືອງຂອງອາເມລິກາ, ປະລິມານນຳເຂົ້າຖົ່ວເຫຼືອງຈາກອາເມລິກາໃນປີ 2017 ຂອງຈີນໄດ້ກວມ 34,39%ຂອງຍອດປະລິມານນຳເຂົ້າຖົ່ວເຫຼືອງຂອງຈີນ. ຊາວກະສິກອນປູກຖົ່ວເຫຼືອງຂອງຈີນໄດ້ຮ້ອງຟ້ອງວ່າ, ນະໂຍບາຍອຸດໜູນຂອງລັດຖະບານອາເມລິກາໄດ້ທຳລາຍເຖິງຜົນປະໂຫຍດຂອງຕົນ, ລັດຖະບານຈີນເຄົາລົບຄວາມຮຽກຮ້ອງຂອງຊາວກະສິກອນ ແລະ ຄຳຮ້ອງຟ້ອງຂອງສະມາຄົມຖົ່ວເຫຼືອງຂອງປະເທດຕົນ. ສະນັ້ນ, ຖົ່ວເຫຼືອງໄດ້ກາຍເປັນໜຶ່ງໃນປະເພດສິນຄ້າທີ່ຈີນໄດ້ຂຶ້ນພາສີຕື່ມຕໍ່ອາເມລິກາ.
ແຕ່ວ່າ, ທ່ານຈູ່ກ່ວງຢ້າວກໍກ່າວວ່າ, ປັດຈຸບັນ, ບັນຊີລາຍການຜະລິດຕະພັນເຫຼົ່ານີ້ຍັງບໍ່ທັນມີຜົນບັງຄັບໃຊ້ເທື່ອ, ສອງຝ່າຍໄດ້ຍົກບັນຫາຂຶ້ນມາໄວ້ເທິງໂຕະ ແລະ ປັດຈຸບັນເປັນເວລາເຈລະຈາແລ້ວເພື່ອສະແຫວງຫາການຮ່ວມມືກັນ, ຂະນະທີ່ປະຖົມປັດໄຈຂອງການເຈລະຈາແລະຮ່ວມມືກັນແມ່ນເຄົາລົບເຊິ່ງກັນແລະກັນ, ຫາກບໍ່ແມ່ນຝ່າຍໜຶ່ງວາງເງື່ອນໄຂໃຫ້ອີກຝ່າຍໜຶ່ງຢ່າງບັງອາດ ແລະ ຕາມໃຈຂອງຕົນ. ທ່ານກ່າວເນັ້ນວ່າ, ທາດແທ້ຂອງການພົວພັນທາງເສດຖະກິດລະຫວ່າງຈີນອາເມລິກາແມ່ນຕ່າງຝ່າຍຕ່າງມີຜົນປະໂຫຍດ. ປະຖົມປັດໄຈແຫ່ງການເຈລະຈາແລະຮ່ວມມືກັນລະຫວ່າງຈີນກັບອາເມລິກາແມ່ນເຄົາລົບເຊິ່ງກັນແລະກັນ. ປະຖົມປັດໄຈຂອງການປຶກສາຫາລືແມ່ນຜ່ອນຜັນແກ່ກັນ, ຫາກບໍ່ແມ່ນຕັ້ງໃຈເຮັດຕາມໃຈຂອງຕົນ.ມີແຕ່ຜ່ານການສົນທະນາທີ່ມີລັກສະນະສ້າງສັນ ແລະ ການປຶກສາຫາລືທີ່ຕິດແທດຕົວຈິງ ຈິ່ງຈະສາມາດແກ້ໄຂຄວາມຂັດແຍ້ງກັນໄດ້.
 |
