ຕາມຂ່າວCRI: ວັນທີ 5 ເມສານີ້, ວັງກຣຳແລັງ ທີ່ນະຄອນຫຼວງມົສກູ, ທ່ານ ວະລາດີເມຍ ປູຕິນ ປະທານາທິບໍດີຣັດເຊຍໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ວາງຢີ້ ທູດພິເສດຂອງທ່ານ ສີຈິ້ນຜິງ ປະທານປະເທດຈີນ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນ.
ທ່ານ ວາງຢີ້ ໄດ້ຝາກຄວາມຊົມເຊີຍຢ່າງຈິງໃຈຂອງທ່ານສີຈິ້ນຜິງ ປະທານປະເທດຈີນຕໍ່ທ່ານ ວະລາດີເມຍ ປູຕິນ ທີ່ໄດ້ດຳລົງຕຳແໜ່ງປະທານາທິບໍດີອີກວາລະໜຶ່ງ. ທ່ານ ວາງຢີ້ ກ່າວວ່າ: ຈີນແລະຣັດເຊຍເປັນຄູ່ຮ່ວມປະສານງານຍຸດທະສາດຮອບດ້ານພຽງໜຶ່ງດຽວຂອງກັນ,ສອງປະເທດໄດ້ມີຄວາມໄວ້ເນື້ອເຊື່ອໃຈກັນທາງການເມືອງໃນລະດັບສູງສຸດ,ການພົວພັນລະຫວ່າງສອງປະເທດໄດ້ກ້າວຂຶ້ນສູ່ລະດັບໃໝ່ຢ່າງຕໍ່ເນື່ອງ. ປັດຈຸບັນ, ສອງປະເທດຕ່າງຫາກໍ່ໄດ້ສິ້ນສຸດວາລະການເມືອງທີ່ສຳຄັນພາຍໃນປະເທດຂອງຕົນຢ່າງສະດວກ, ທ່ານ ສີຈິ້ນຜິງ ປະທານປະເທດຈີນໄດ້ສະແດງຄວາມຍິນດີຕ້ອນຮັບຕໍ່ທ່ານ ວະລາດີເມຍ ປູຕິນ ປະທານາທິບໍດີຣັດເຊຍເດີນທາງໄປເຂົ້າຮ່ວມກອງປະຊຸມສຸດຍອດຊິ່ງຕາວຂອງອົງການຮ່ວມມືຊຽງໄຮຢູ່ຈີນໃນເດືອນມິຖຸນາປີນີ້ແລະຢ້ຽມຢາມຈີນທາງລັດຖະກິດ, ສອງຝ່າຍຄວນເລັ່ງການກະກຽມ,ຮັບປະກັນການຢ້ຽມຢາມຄັ້ງນີ້ແລະການພົບປະທີ່ສຳຄັນຕ່າງໆລະຫວ່າງປະມຸກລັດສອງປະເທດໃນປີນີ້ຈົ່ງປະສົບຜົນສຳເລັດທີ່ອຸດົມສົມບູນ,ເປີດຍຸກໃໝ່ແຫ່ງການພົວພັນລະຫວ່າງສອງປະເທດ. ສອງຝ່າຍຄວນປົກປັກຮັກສາຄວາມໝັ້ນຄົງແລະຜົນປະໂຫຍດຂອງປະເທດຕົນໃຫ້ດີກວ່າເກົ່າ ແລະປົກປັກຮັກສາສັນຕິພາບແລະສະຖຽນລະພາບຂອງພາກພື້ນກໍ່ຄືຂອງໂລກ ໂດຍຜ່ານການຕິດຕໍ່ພົວພັນແລະການປະສານງານທີ່ຍິ່ງແໜ້ນແຟ້ນກວ່າເກົ່າແລະມີລະດັບສູງກວ່າເກົ່າ.
ທ່ານ ປູຕິນ ໄດ້ຜ່ານທ່ານ ວາງຢີ້ ຝາກຄວາມຊົມເຊີຍຢ່າງຈິງໃຈຕໍ່ທ່ານ ສີຈິ້ນຜິງ ປະທານປະເທດຈີນໄດ້ຮັບເລືອກຕັ້ງເປັນປະທານປະເທດດ້ວຍສຽງເຫັນດີໝົດອີກຄັ້ງໜຶ່ງ,ພ້ອມທັງກ່າວວ່າ,ສາຍພົວພັນລະຫວ່າງຈີນ-ຣັດເຊຍດີຫຼາຍ,ສອງປະເທດເປັນປະເທດບ້ານໃກ້ຄຽງ,ກໍ່ເປັນຄູ່ຮ່ວມທຳມະຊາດ,ສອງຝ່າຍໄດ້ກາຍເປັນຄູ່ຮ່ວມປະສານງານຍຸດທະສາດຮອບດ້ານແມ່ນການຄັດເລືອກທີ່ໄດ້ຜ່ານການພິຈາລະນາຢ່າງສຸຂຸມຮອບຄອບຈາກສອງຝ່າຍ. ຂ້າພະເຈົ້າຄອງຄອຍຈະໄປຢ້ຽມຢາມຈີນອີກຄັ້ງໜຶ່ງໃນເດືອນມິຖຸນາປີນີ້ ແລະ ສືບຕໍ່ຮັກສາການຕິດຕໍ່ພົວພັນຢ່າງໃກ້ຊິດກັບທ່ານປະທານສີຈິ້ນຜິງ ໂດຍຜ່ານເວທີສອງຝ່າຍແລະຫຼາຍຝ່າຍ.
 |
