ຕາມຂ່າວສານຊິ່ນຮວາ: ກະຊວງການຄ້າຈີນແຈ້ງຂ່າວວ່າ, ວັນທີ 5 ເມສານີ້, ກ່ຽວກັບມາດຕະການ 232 ກ່ຽວກັບການນຳເຂົ້າເຫຼັກກ້າແລະອາລຸຍນຽມຂອງອາເມລິກາ, ຈີນໄດ້ສະເໜີການຮ້ອງຂໍດຳເນີນການປຶກສາຫາລືຕໍ່ຝ່າຍອາເມລິກາພາຍໃຕ້ກົນໄກແກ້ໄຂຄວາມຂັດແຍງຂອງອົງການການຄ້າໂລກ, ເຊິ່ງໄດ້ເລີ່ມຕົ້ນຂັ້ນຕອນແກ້ໄຂຄວາມຂັດແຍ້ງຢ່າງເປັນທາງການ.
ຜູ້ຮັບຜິດຊອບກົມກົດໝາຍແລະສັນຍາກະຊວງການຄ້າຈີນກ່າວຄຳເຫັນໂດຍຊີ້ອອກວ່າ, ມາດຕະການ 232 ຂອງອາເມລິກາຖືການປ້ອງກັນຄວາມໝັ້ນຄົງແຫ່ງຊາດເປັນຂໍອ້າງ, ແຕ່ທີ່ຈິງແລ້ວ ຫາກແມ່ນປະຕິບັດລັດທິປົກປ້ອງການຄ້າ. ອາເມລິກາໄດ້ເລືອກຫຼີກລ່ຽງປະເທດແລະເຂດແຄ້ວນຈຳນວນໜຶ່ງ, ແຕ່ພັດປະຕິບັດມາດຕະການຂຶ້ນອັດຕາພາສີຕໍ່ສະມາຊິກອົງການການຄ້າໂລກຈຳນວນໜຶ່ງທີ່ລວມທັງຈີນ. ການກະທຳແບບນີ້ຂອງອາເມລິກາໄດ້ຝ່າຝືນຫຼັກການບໍ່ຈຳແນກຂອງກົນໄກການຄ້າຫຼາຍຝ່າຍຢ່າງໜັກໜ່ວງ, ແລະໄດ້ຝ່າຝືນຄຳໝັ້ນສັນຍາຫຼຸດພາສີ ພ້ອມທັງລະບຽບການແລະວິໄນກ່ຽວກັບມາດຕະການຮັບປະກັນທີ່ກ່ຽວຂ້ອງ ພາຍໃຕ້ຂອບອົງການການຄ້າໂລກຢ່າງໜັກໜ່ວງ, ໄດ້ທຳລາຍສິດແລະຜົນປະໂຫຍດຊອບທຳຂອງຈີນໃນຖານະເປັນສະມາຊິກອົງການການຄ້າໂລກ.
ຜູ້ຮັບຜິດຊອບຜູ້ນີ້ກ່າວຕື່ມວ່າ, ໂດຍພິຈາລະນາເຖິງອາເມລິກາປະຕິເສດດຳເນີນການເຈລະຈາຊົດເຊີຍກັບຈີນ ອີງຕາມລະບຽບການຂອງອົງການການຄ້າໂລກ, ຈີນຈຳເປັນຕ້ອງເລີ່ມຕົ້ນຂັ້ນຕອນແລະແກ້ໄຂຄວາມຂັດແຍ່ງ, ເພື່ອປ້ອງການສິດແລະຜົນປະໂຫຍດຊອບກົດໝາຍຂອງຕົນ.
 |
