ວັນທີ 5 ເມສານີ້, ທ່ານໂດນັນ ທຣຳ ປະທານາທິບໍດີອາເມລິກາອອກຖະແຫຼງການໂດຍກ່າວວ່າ, ໂດຍອີງຕາມ "ການກວດກາ 301", ຕົວເອງໄດ້ອອກຄຳສັ່ງໃຫ້ຫ້ອງການຕົວແທນການຄ້າອາເມລິກາພິຈາລະນາວ່າຈະຂຶ້ນອັດຕາພາສີຕໍ່ສິນຄ້າທີ່ມີມູນຄ່າ 100 ຕື້ທີ່ນຳເຂົ້າຈາກຈີນອີກ ຈະເໝາະສົມຫຼືບໍ່.
ຖະແຫຼງການຂຽນຕື່ມວ່າ, ຖ້າຫ້ອງການຕົວແທນການຄ້າອາເມລິກາເຫັນວ່າເລື່ອງນີ້ເໝາະສົມ, ຄວນວາງບັນຊີລາຍການສິນຄ້າຂຶ້ນອັດຕາພາສີທີ່ສົມຄູ່ກັນ. ມື້ດຽວກັນ, ຫ້ອງການຕົວແທນການຄ້າອາເມລິກາໃຫ້ຄຳຕອບວ່າ, ປະທານາທິບໍດີຮຽກຮ້ອງໃຫ້ໃຊ້ມາດຕະການຂວ້ຳບາດເພີ່ມຕື່ມແມ່ນ "ເໝາະສົມ", ມາດຕະການສະເໜີໃຫ້ຂຶ້ນພາສີໃດໆລ້ວນແຕ່ຈະຮັບຟັງຄວາມເຫັນຈາກປະຊາຊົນ ເຊິ່ງໝາຍຄວາມວ່າ, ມາດຕະການຂຶ້ນອັດຕາພາສີຕື່ມດັ່ງກ່າວຈະບໍ່ມີຜົນບັງຄັບໃຊ້ ກ່ອນທີ່ຫ້ອງການດັ່ງກ່າວສຳເລັດໝົດທຸກຂັ້ນຕອນ.
ກ່ອນໜ້ານີ້, ໂດຍອີງຕາມຜົນ "ການກວດກາ 301", ຫ້ອງການຕົວແທນການຄ້າອາເມລິກາໄດ້ເປີດເຜີຍບັນຊີລາຍການສິນຄ້າຈີນທີ່ກຽມຈະຂຶ້ນອັດຕາພາສີ ເຊິ່ງພົວພັນເຖິງສິນຄ້າທີ່ມີມູນຄ່າເກືອບ 50 ຕື້ໂດລາທີ່ນຳເຂົ້າຈາກຈີນ. ການກະທຳຫຼ້າສຸດຂອງທ່ານທຣຳໝາຍຄວາມວ່າ, ອາເມລິກາອາດຈະຂຶ້ນອັດຕາພາສີຕໍ່ສິນຄ້າທີ່ມີມູນຄ່າປະມານ 150 ຕື້ໂດລາທີ່ນຳເຂົ້າຈາກຈີນ.