ທ່ານ ນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍໄດ້ປະກາດໃນວັນທີ 6 ເມສານີ້ວ່າ: ຊຸນຕັນ ມູຮຳເມັດ ຄີ ອົງທີ 5 ຜູ້ນຳສູງສຸດປະເທດມາເລເຊຍໄດ້ເຫັນດີນຳຄຳຮ້ອງຂໍຂອງທ່ານ ໂດຍໄດ້ອະນຸມັດໃຫ້ຍຸບສະພາແຫ່ງຊາດໃນວັນທີ 7 ເມສານີ້ ເພື່ອກຽມຈັດການເລືອກຕັ້ງທົ່ວໄປຄັ້ງໃໝ່.
ສະພາຊຸດປັດຈຸບັນຂອງມາເລເຊຍຈະສິ້ນສຸດອາຍຸການປະຕິບັດໜ້າທີ່ໃນວັນທີ 24 ມິຖຸນາປີນີ້. ສ່ວນນາຍົກລັດຖະມົນຕີມາເລເຊຍມີສິດສະແຫວງຫາການຍຸບສະພາແຫ່ງຊາດໃນທຸກເວລາກ່ອນອາຍຸການປະຕິບັດໜ້າທີ່ສິ້ນສຸດ. ຕາມກົດໝາຍມາເລເຊຍ,ການປ່ອນບັດຂອງການເລືອກຕັ້ງທົ່ວໄປຕ້ອງຈັດຂຶ້ນພາຍໃນ 60 ວັນຫຼັງຍຸບສະພາ.
ໃນຕອນເຊົ້າວັນທີ 6 ເມສານີ້, ທ່ານ ນາຈິບ ຕຸນ ຣາຊັກ ໄດ້ກ່າວຄຳປາໄສທາງໂທລະພາບຫຼັງເປັນປະທານຈັດກອງປະຊຸມຄະນະລັດຖະບານຢູ່ສຳນັກນາຍົກລັດຖະມົນຕີທີ່ເມືອງປູຕຣາຈາຢາທີ່ເປັນນະຄອນຫຼວງບໍລິຫານ. ທ່ານໄດ້ສະເໜີໃຫ້ອົງການປົກຄອງຂອງລັດຕ່າງໆຍຸບສະພາຂອງລັດຕົນຕາມຂັ້ນຕອນ,ເພື່ອຈັດການເລືອກຕັ້ງສະພາຂອງລັດທ້ອງຖິ່ນໃນເວລາດຽວກັນກັບການເລືອກຕັ້ງທົ່ວໄປຂອງສະພາແຫ່ງຊາດ.
 |
