ທ່ານເຊ້ຍສຽງ ອັກຄະລັດຖະທູດຫ້ອງການທີ່ປຶກສາເສດຖະກິດການຄ້າຄະນະທູດຈີນປະຈຳສະຫະພາບເອີຣົບ ກ່າວໃນວັນທີ 7 ເມສານີ້ວ່າ: ຈີນບໍ່ແມ່ນພຽງຜູ້ດຽວທີ່ໄດ້ຮັບຜົນກະທົບຈາກ "ການກວດກາ 301" ຂອງອາເມລິກາ ໂດຍໃນປະຫວັດສາດ, ສະຫະພາບເອີຣົບກໍເປັນເປົ້າໝາຍ "ການກວດກາ 301" ຂອງອາເມລິກາຫຼາຍເທື່ອເຊັ່ນດຽວກັນ ແລະຖືກກະທົບຢ່າງໜັກໜ່ວງ ສະນັ້ນ, ຈີນ ແລະສະຫະພາບເອີຣົບ ຄວນຮ່ວມມືກັນເພື່ອຄັດຄ້ານ ແລະຕ້ານທານການກະທຳຂອງອາເມລິກາ.
ທ່ານເຊ້ຍສຽງ ກ່າວວ່າ: ຈີນໃນຖານະເປັນປະເທດໃຫຍ່ໃນອຸດສາຫະກຳການຜະລິດ ວັດຖຸດິບອຸດສາຫະກຳ, ເຄື່ອງອາໄລ່-ຊີກສ່ວນ ແລະ ຜະລິດຕະພັນວິທະຍາສາດ-ເຕັກນິກຈຳນວນຫຼວງຫຼາຍ ລ້ວນແຕ່ແມ່ນນຳເຂົ້າຈາກປະເທດທີ່ພັດທະນາແລ້ວ ລວມທັງສະຫະພາບເອີຣົບ. ບຸກຄົນວົງການອຸດສາຫະກຳການຄ້າສະຫະພາບເອີຣົບ ກໍໄດ້ແລກປ່ຽນກັບຕົນ ໂດຍຊີ້ວ່າ ສົງຄາມການຄ້າທີ່ອາເມລິກາກໍ່ຂຶ້ນເທື່ອນີ້ ຈະບໍ່ມີຝ່າຍໃດເປັນຝ່າຍຊະນະ ແລະຈະເປັນການທຳລາຍລະບຽບການຄ້າສາກົນທັງນັ້ນ.
ທ່ານເຊ້ຍສຽງ ຍັງກ່າວຕື່ມວ່າ: ອາເມລິກາອ້າງວ່າຮັກສາຄວາມປອດໄພຂອງປະເທດຕົນ ແຕ່ໃນທາດແທ້ພັດເປັນການກະທຳປົກປ້ອງການຄ້າຝ່າຍດຽວ ເຊິ່ງຈະບັ່ນທອນໂຄງປະກອບການຄ້າຫຼາຍຝ່າຍທີ່ມີອົງການການຄ້າໂລກເປັນໃຈກາງ. ຂະນະທີ່ຈີນແລະສະຫະພາບເອີຣົບໃນຖານະເປັນຄູ່ຍຸດທະສາດຮອບດ້ານ ຄວນຮ່ວມມືກັນເພື່ອຄັດຄ້ານລັດທິປົກປ້ອງການຄ້າ ແລະຮັກສາລະບຽບການຄ້າສາກົນ.
