ກອງປະຊຸມເວທີປຶກສາຫາລືອາຊີໂປອາວ 2018 ຈະຈັດຂຶ້ນຢູ່ເມືອງໂປອາວ ແຂວງໄຫຫຼຳ ປະເທດຈີນ ແຕ່ວັນທີ 8-11 ເມສານີ້, ຂະນະທີ່ຜູ້ຊ່ຽວຊານ, ນັກວິຊາການປະເທດຕ່າງໆ ກໍຄອງຄອຍຈະໄດ້ຍິນສຽງຈາກໂປອາວ, ຈີນ ກໍຄື ອາຊີ ກ່ຽວກັບການຫາລືແຜນການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະ ຮ່ວມສະແຫວງຫາວິທີການພັດທະນາ-ຈະເລີນຮຸ່ງເຮືອງ.
ທ່ານຊົກຊີພານາ ທີ່ປຶກສາລັດຖະບານກຳປູເຈຍ, ຜູ້ຮັບຜິດຊອບກອງເລຂາກຳປູເຈຍການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ກ່າວວ່າ: ເວທີປຶກສາຫາລືອາຊີໂປອາວ ຈະມີບົດບາດຢ່າງກວ້າງຂວາງຕໍ່ການພັດທະນາເຕີບໂຕຂອງເສດຖະກິດໂລກ ແລະບັນຫາການປົກຄອງໃນທົ່ວໂລກ(Global Governance), ນະໂຍບາຍການປະຕິຮູບ-ເປີດປະຕູສູ່ພາຍນອກ ແລະການພັດທະນາໂດຍສັນຕິຂອງຈີນ ຈະສ້າງຜົນປະໂຫຍດໃຫ້ແກ່ອາຊີ ແລະໂລກ. ຈະແກ້ໄຂບັນຫາການພັດທະນາທົ່ວໂລກແນວໃດ? ຄິດວ່າຄຳຕອບອາດຈະຢູ່ກັບຈີນ.
ທ່ານລີຊິງຢີ ກຳມະການປະຕິບັດງານສູນສຶກສາຄົ້ນຄວ້າສັງຄົມ-ເສດຖະກິດ ສະມາຄົມການຄ້າຈີນຂອງມາເລເຊຍ ກ່າວວ່າ: ຈີນປົກປ້ອງເສລີພາບດ້ານການຄ້າທົ່ວໂລກ ໄດ້ສ້າງສະພາບແວດລ້ອມການພັດທະນາເສດຖະກິດທີ່ດີໃຫ້ແກ່ປະເທດຕ່າງໆໃນອາຊີ. ພວກຂ້າພະເຈົ້າຫວັງວ່າ ຈີນຈະກຳນົດເອົາເວທີປຶກສາຫາລືອາຊີໂປອາວເປັນເວທີ ເພື່ອສືບຕໍ່ປົກປ້ອງລະບົບການຄ້າເສລີ ແລະໃສ່ພະລັງຊຸກດັນເພື່ອການພັດທະນາແບບຍືນຍົງຂອງເສດຖະກິດໂລກ.
ທ່ານລີເຣີນລຽງ ຜູ້ຊ່ຽວຊານດ້ານບັນຫາສາກົນ ສະຖາບັນບັນດິດພັດທະນາບໍລິຫານສາດຂອງໄທ ຊີ້ໃຫ້ເຫັນວ່າ: ປັດຈຸບັນ, ຈຸດໜັກແຫ່ງການພັດທະນາເສດຖະກິດທົ່ວໂລກພວມຍ້າຍໄປສູ່ຕາເວັນອອກ, ຂະນະທີ່ຍຸດທະສາດການພັດທະນາ 4,0, ການຜະລິດຈີນ 2025 ແລະອື່ນໆ ລ້ວນແຕ່ເປັນຕົວແທນແຫ່ງທິດທາງການພັດທະນາເສດຖະກິດໃນອະນາຄົດ ເຊິ່ງຈະຊຸກຍູ້ການພັດທະນາເສດຖະກິດ ແລະສ້າງຄວາມຈະເລີນຮຸ່ງເຮືອງຢ່າງຕໍ່ເນື່ອງຂອງໂລກ.
