ກອງປະຊຸມຖະແຫຼງຂ່າວຂອງເວທີປຶກສາຫາລືອາຊີໂປອາວ 2018 ໄດ້ເຜີຍແຜ່ບົດລາຍງານປະຈຳປີ 2018 ກ່ຽວກັບການພັດທະນາຂອງກຸ່ມເສດຖະກິດທີ່ພັດທະນາໃໝ່ໃນວັນທີ 8 ເມສານີ້ໂດຍສະແດງໃຫ້ເຫັນວ່າ,ປີ 2018, ກຸ່ມເສດຖະກິດທີ່ພັດທະນາໃໝ່ຈະຮັກສາທ່າອ່ຽງແຫ່ງການເຕີບໂຕທີ່ດີຢ່າງຕໍ່ເນື່ອງ ແລະເມື່ອທຽບກັບປີ 2017 ແລ້ວ, ຄວາມໄວການເຕີບໂຕຂອງກຸ່ມເສດຖະກິດທີ່ພັດທະນາໃໝ່ມີຄວາມອາດເປັນໄປໄດ້ຫຼາຍກວ່າທີ່ຈະຮັກສາທ່າອ່ຽງເກົ່າຫຼືສູງຂຶ້ນເລັກໜ້ອຍ.
ບົດລາຍງານລະບຸວ່າ, ປີ 2017, ຍ້ອນໄດ້ຮັບຜົນປະໂຫຍດຈາກຄວາມຕ້ອງການພາຍນອກເພີ່ມຂຶ້ນຢ່າງຫຼວງຫຼາຍແລະຄວາມຕ້ອງການດ້ານການບໍລິໂພກພາຍໃນປະເທດທີ່ມີຄວາມໝັ້ນທ່ຽງໂດຍລວມ, ເສດຖະກິດຂອງກຸ່ມເສດຖະກິດທີ່ພັດທະນາໃໝ່ 11 ກຸ່ມໃນກຸ່ມ 20 ປະເທດຫຼື E11 ເຊັ່ນ: ເບຼຊິນ, ຈີນ ແລະອິນເດຍເປັນຕົ້ນໄດ້ເຕີບໂຕໄວຂຶ້ນຢ່າງຈະແຈ້ງ, ແລະມີທ່າອ່ຽງທີ່ເຫັນໄປໃນແງ່ດີໂດຍລວມ.
ປີ 2017, ຈັງຫວະການເຕີບໂຕຂອງລວມຍອດມູນຄ່າຜະລິດຕະພັນພາຍໃນປະເທດຫຼື GDP ຂອງ E11 ບັນລຸປະມານ 5,1%, ເພີ່ມຂຶ້ນ 0.5% ເມື່ອທຽບກັບປີ 2016, ສູງກວ່າຈັງຫວະການເຕີບໂຕຂອງເສດຖະກິດໂລກ 1,4%.
ສິ່ງທີ່ໜ້າສົນໃຈແມ່ນ, ໃນຖານະເປັນກຸ່ມເສດຖະກິດທີ່ພັດທະນາໃໝ່ທີ່ໃຫຍ່ທີ່ສຸດ, ເສດຖະກິດຈີນໄດ້ພັດທະນາດີກວ່າຄາດໝາຍ ໂດຍບັນລຸການເຕີບໂຕ 6,9% ເຊິ່ງເປັນລະດັບປານກາງແຕ່ກໍ່ສູງສົມຄວນ ໄດ້ປະກອບສ່ວນປະມານ 1 ສ່ວນ 3 ຕໍ່ການເຕີບໂຕຂອງເສດຖະກິດໂລກ ແລະສືບຕໍ່ເປັນຜູ້ປະກອບສ່ວນໃຫຍ່ຫຼວງກວ່າໝູ່.
 |
