ວັນທີ 8 ເມສານີ້, ທ່ານ ສີຈິ້ນຜິງ ປະທານປະເທດຈີນໄດ້ພົບປະກັບທ່ານ ອັນໂຕນີໂອ ກູເຕີເຣສ ເລຂາທິການໃຫຍ່ອົງການສະຫະປະຊາຊາດຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ.
ທ່ານ ສີຈິ້ນຜິງໄດ້ສະແດງຄວາມຍິນດີຕ້ອນຮັບທ່ານ ກູເຕີເຣສ ຢ້ຽມຢາມຈີນພ້ອມທັງເຂົ້າຮ່ວມກອງປະຊຸມປະຈຳປີຂອງເວທີປຶກສາຫາລືອາຊີໂປອາວ 2018. ທ່ານ ສີຈິ້ນຜິງ ຊີ້ວ່າ: ສະຖານະການສາກົນໃນຊຸມປີຜ່ານມາໄດ້ມີການພັດທະນາແລະປ່ຽນແປງໃໝ່. ບັນຫາໃນສາກົນກໍ່ສັບສົນຫຼາຍ, ເວົ້າໂດຍລວມແລ້ວກໍ່ຄວນແກ້ໄຂບັນຫາລະບົບແລະຄວາມສາມາດດ້ານການຄຸ້ມຄອງໃຫ້ດີ. ພວກຂ້າພະເຈົ້າຈະຊຸກຍູ້ແລະປັບປຸງການຄຸ້ມຄອງຂອງໂລກໃຫ້ດີຂຶ້ນຢ່າງບໍ່ຢຸດຢັ້ງ ເພື່ອຮັບມືກັບສິ່ງທ້າທາຍດັ່ງກ່າວ.
ທ່ານ ສີຈິ້ນຜິງ ກ່າວເນັ້ນວ່າ: ການສະໜັບສະໜູນອົງການສະຫະປະຊາຊາດເສີມຂະຫຍາຍບົດບາດຂອງຕົນ ແລະການຮັກສາອິດທິພົນແລະຖານະຂອງອົງການສະຫະປະຊາຊາດ ແມ່ນນະໂຍບາຍໂດຍພື້ນຖານຂອງວຽກງານການຕ່າງປະເທດຂອງຈີນ. ພວກຂ້າພະເຈົ້າມີຈຸດຢືນທີ່ປະເທດໃຫຍ່ແລະນ້ອຍມີຄວາມສະເໝີພາບກັນ ຂະນະດຽວກັນກໍ່ເຫັນວ່າປະເທດໃຫຍ່ຄວນແບກຫາບໜ້າທີ່ຂອງຕົນເທົ່າທີ່ຄວນ.
ໂອກາດນີ້, ທ່ານ ກູເຕີເຣສ ໄດ້ສະແດງຄວາມຊົມເຊີຍອີກຄັ້ງໜຶ່ງຕໍ່ທ່ານ ສີຈິ້ນຜິງ ທີ່ໄດ້ຮັບເລືອກຕັ້ງເປັນປະທານປະເທດຈີນ ແລະກ່າວດ້ວຍຄວາມຍ້ອງຍໍວ່ານີ້ມີຄວາມໝາຍທີ່ມີລັກສະນະປະຫວັດສາດຕໍ່ຈີນ. ຈີນໄດ້ກາຍເປັນເສົາຄ້ຳທີ່ສຳຄັນທີ່ສຸດຂອງລັດທິຫຼາຍຝ່າຍ ແລະເປັນກຳລັງທີ່ສຳຄັນທີ່ຂາດບໍ່ໄດ້ແລະໜ້າໄວ້ເນື້ອເຊື່ອໃຈໃນການຊຸກຍຸ້ສັນຕິພາບແລະການພັດທະນາຂອງໂລກ. ການຮ່ວມມືລະຫວ່າງອົງການສະຫະປະຊາຊາດກັບຈີນມີຄວາມສຳຄັນຫຼາຍຕໍ່ໂລກ. ຂ້າພະເຈົ້າເຫັນດີນຳຈຸດຢືນຂອງທ່ານປະທານສີຈິ້ນຜິງກ່ຽວກັບການສ້າງຄູ່ຮ່ວມຊາຕາກຳມວນມະນຸດ,ສະໜັບສະໜູນການຮ່ວມມືໃນຂອບ "ໜຶ່ງແລວໜຶ່ງເສັ້ນທາງ" ຂອງຈີນແລະຂໍ້ລິເລີ່ມທີ່ສຳຄັນອື່ນໆທີ່ມີຈຸດປະສົງເພື່ອບັນລຸຄວາມຈະເລີນຮຸ່ງເຮືອງຮ່ວມກັນຂອງທຸກປະເທດ ແລະເຊື່ອໝັ້ນວ່າຂໍ້ລິເລີ່ມເຫຼົ່ານີ້ຈະນຳເອົາຜົນປະໂຫຍດທີ່ໃຫຍ່ທີ່ສຸດມາໃຫ້ແກ່ປະຊາຄົມໂລກ.
 |
