ວັນທີ 8 ເມສານີ້, ຂ່າວສານຊີນຮວາຈີນໄດ້ເຜີຍແຜ່ບົດວິຈານສາກົນທີ່ມີຫົວຂໍ້ "ນະໂຍບາຍໃຊ້ອຳນາດບາດໃຫຍ່ດ້ານການຄ້າຂອງອາເມລິກາໄດ້ຢຽບຫຍາມຈິດໃຈສັນຍາຢ່າງໜັກໜ່ວງ" ໂດຍລະບຸວ່າ, ຫວ່າງມໍ່ໆມານີ້, ລັດຖະບານອາເມລິກາໄດ້ເປີດເຜີຍບັນຊີລາຍການສິນຄ້າຈີນທີ່ອາດຈະຂຶ້ນອັດຕາພາສີຕາມຜົນການກວດກາ 301 ແລະໄດ້ຂົ່ມຂູ່ວ່າຈະວາງມາດຕະການຂຶ້ນພາສີຕື່ມອີກ. ການກະທຳລັດທິຝ່າຍດຽວແລະລັດທິປົກປ້ອງການຄ້າແບບນີ້ໄດ້ຖືກປະຕິເສດຢ່າງເດັດຂາດຈາກຈີນ ແລະ ຖືກບຸກຄົນເບິ່ງກວ້າງເຫັນໄກສາກົນຕຳນິຢ່າງກວ້າງຂວາງ. ການກະທຳຂອງອາເມລິກາໄດ້ຝ່າຝືນຫຼັກການແລະຈິດໃຈຂອງອົງການການຄ້າໂລກ, ເປັນການຢຽບຫຍາມຢ່າງໜັກໜ່ວງຕໍ່ຈິດໃຈການປະຕິບັດສັນຍາທີ່ສັງຄົມການຄ້າສາກົນຍຶດຖື, ກໍ່ຖືເປັນການທ້າທາຍເກາະຜິດຢ່າງບັງອາດຕໍ່ລະບົບການຄ້າຫຼາຍຝ່າຍທີ່ປະຕິບັດໃນປັດຈຸບັນ.
ບົດຄວາມລະບຸວ່າ: ອາເມລິກາແມ່ນສະມາຊິກອົງການການຄ້າໂລກ,ຄວນແກ້ໄຂຄວາມຂັດແຍ້ງກັນດ້ານການຄ້າກັບປະເທດອື່ນໃນຂອບຫຼາຍຝ່າຍຂອງອົງການການຄ້າໂລກ. ແຕ່ອາເມລິກາບໍ່ໄດ້ຫົວຊານຳລະບຽບການແລະໜ້າທີ່ທີ່ຄວນເຄົາລົບປະຕິບັດຂອງຕົນຢ່າງເຖິງຖອງໃນຖານະເປັນສະມາຊິກອົງການການຄ້າໂລກ, ຍົກໄມ້ຄ້ອນລັດທິປົກປ້ອງການຄ້າຝ່າຍດຽວ, ແລະຖິ້ມຄວາມຫຍຸ້ງຍາກຂອງຕົນໃຫ້ປະເທດອື່ນ.ອັນທີ່ວ່າການກວດກາ 301 ແມ່ນຂະບວນການໜຶ່ງທີ່ອາເມລິກາກໍ່ຂຶ້ນ,ກວດກາ,ຕັດສິນ,ແລະປະຕິບັດພຽງແຕ່ຝ່າຍດຽວ ທາດແທ້ຂອງການກວດກາດັ່ງກ່າວແມ່ນອີງຕາມກົດໝາຍພາຍໃນປະເທດອາເມລິກາ,ມີລັກສະນະລັດທິຝ່າຍດຽວທີ່ຮຸນແຮງ,ຂາດຄວາມເປັນທຳ ເຊິ່ງນີ້ບໍ່ແມ່ນການກະທຳຂອງປະເທດໃຫຍ່ປະເທດໜຶ່ງທີ່ມີໜ້າທີ່ຮັບຜິດຊອບແລະປະຕິບັດຕາມຄຳໝັ້ນສັນຍາຂອງຕົນ.
ບົດຄວາມຍັງເນັ້ນວ່າ: ໃນຍຸກປັດຈຸບັນທີ່ເປັນຍຸກໂລກາພິວັດ,ບັນດາປະເທດໃນໂລກແລກປ່ຽນແລະໄປມາຫາສູ່ກັນ,ຈະເລີນຮຸ່ງເຮືອງຮ່ວມກັນໄດ້ກາຍເປັນຄວາມຮັບຮູ້ຢ່າງເປັນເອກະພາບແລະເປັນເປົ້າໝາຍຂອງການພັດທະນາ. ສ່ວນນະໂຍບາຍໃຊ້ອຳນາດບາດໃຫຍ່ດ້ານການຄ້າຝ່າຍດຽວຂອງອາເມລິກາໄດ້ທຳລາຍຜົນປະໂຫຍດໃຈກາງຂອງຄູ່ຮ່ວມມືການຄ້າແລະຜົນປະໂຫຍດຮ່ວມຂອງໂລກ,ເປັນການຢຽບຫຍາມຕໍ່ຈິດໃຈສັນຍາຢ່າງໜັກໜ່ວງ. ຢູ່ລະຫວ່າງຄົນກັບຄົນຖ້າບໍ່ມີຄວາມໄວ້ເນື້ອເຊື່ອໃຈກັນກໍ່ບໍ່ສາມາດຢູ່ນຳສັງຄົມໄດ້,ຢູ່ລະຫວ່າງປະເທດກັບປະເທດຖ້າບໍ່ມີຄວາມຈິງໃຈຕໍ່ກັນກໍ່ຈະບໍ່ສາມາດຈະເລີນຮຸ່ງເຮືອງ. ສະນັ້ນຈຶ່ງເຕືອນໃຫ້ອາເມລິກາບໍ່ຄວນເດີນຕາມເສັ້ນທາງທີ່ຜິດພາດແລະແຮ່ງເດີນແຮ່ງໄປໄກ ຖ້າບໍ່ດັ່ງນັ້ນ ໃນທີ່ສຸດຈະບໍ່ສາມາດໄດ້ຮັບຜົນດີຫຍັງເລີຍ.
 |
