ວັນທີ 8 ເມສານີ້, ເວທີປຶກສາຫາລືອາຊີໂປອາວໄດ້ເຜີຍແຜ່ບົດລາຍງານກຳລັງການແຂ່ງຂັນອາຊີປະຈຳປີ 2018 ໂດຍຊີ້ໃຫ້ເຫັນວ່າ: ເນື່ອງຈາກເສດຖະກິດຂອງໂລກຟື້ນຟູຄືນ ແລະການເຊື່ອມໂຍງເສດຖະກິດພາກພື້ນອາຊີເລັ່ງລັດໄວຂຶ້ນ, ເຮັດໃຫ້ກຸ່ມເສດຖະກິດຕ່າງໆໃນອາຊີມີສະພາບການທີ່ດີ. ບົດລາຍງານຍັງເຕືອນວ່າ: ການປົກປ້ອງການຄ້າບໍ່ສາມາດກາຍເປັນກຳລັງຊຸກດັນຖາວອນໃນການພັດທະນາເສດຖະກິດ ແລະອາດຈະຈຳກັດຄວາມຍືນຍົງຂອງການພັດທະນາເສດຖະກິດອີກ.
ບົດລາຍງານດັ່ງກ່າວໄດ້ວິເຄາະກຳລັງການແຂ່ງຂັນຂອງກຸ່ມເສດຖະກິດອາຊີ 37 ກຸ່ມ. ໂດຍລະບຸວ່າ: ໂດຍເບິ່ງຈາກຄວາມສາມາດບົ່ມຊ້ອນດ້ານການເຕີບໂຕຂອງເສດຖະກິດ, ການປະກອບສ່ວນເຂົ້າໃນການເຕີບໂຕຂອງເສດຖະກິດໂລກ ແລະຄວາມປອດໃສຂອງການເຄື່ອນໄຫວເສດຖະກິດ, ກຳລັງການແຂ່ງຂັນຂອງເສດຖະກິດຈີນແມ່ນຢູ່ນຳໜ້າ. ເຖິງແມ່ນວ່າຈັງຫວະການເຕີບໂຕຂອງເສດຖະກິດຈີນຫຼຸດລົງເຖິງເກືອບ 7% ກໍຕາມ, ແຕ່ປະລິມານການເພີ່ມຂຶ້ນຍັງມີຄວາມສຳຄັນຕໍ່ການເຕີບໂຕຂອງເສດຖະກິດໂລກ.
ທ່ານໂຈ່ວເວີນຈົ້ງ ເລຂາທິການໃຫຍ່ເວທີປຶກສາຫາລືອາຊີໂປອາວກ່າວວ່າ: ໃນໄລຍະ 20 ປີຜ່ານມາ, ກຸ່ມເສດຖະກິດທີ່ກຳລັງພັດທະນາໃນອາຊີມີຈັງຫວະການເຕີບໂຕສະເລ່ຍຕໍ່ປີເຖິງ 6,8% ສູງກວ່າພາກພື້ນອື່ນໆ.