ທ່ານ ສີຈິ້ນຜິງ ປະທານປະເທດຈີນ ໄດ້ພົບປະເຈລະຈາກັບທ່ານ ອາເລັກຊັງເດີ ວັນ ເດີ ເບເລນ ປະທານາທິບໍດີໂອຕຼິສຢູ່ຫໍສະພາປະຊາຊົນໃນວັນທີ 8 ເມສານີ້. ໂອກາດດັ່ງກ່າວ, ປະມຸກລັດສອງປະເທດເປັນເອກະພາບກັນຕົກລົງສ້າງຕັ້ງສາຍພົວພັນຄູ່ຮ່ວມຍຸດທະສາດມິດຕະພາບຈີນ-ໂອຕຼິສ ແລະຊຸກຍູ້ການຮ່ວມມືທີ່ແທດເໝາະກັບຕົວຈິງລະຫວ່າງສອງປະເທດໃຫ້ຍົກລະດັບໃໝ່. ທ່ານ ເຊບາສະຕຽນ ເຄີສ ນາຍົກລັດຖະມົນຕີໂອຕຼິສໄດ້ເຂົ້າຮ່ວມການພົບປະເຈລະຈາດັ່ງກ່າວ.
ທ່ານ ສີຈິ້ນຜິງ ໄດ້ສະແດງຄວາມຍິນດີຕ້ອນຮັບທ່ານ ວັນ ເດີ ເບເລນທີ່ຢ້ຽມຢາມຈີນທາງລັດຖະກິດເປັນຄັ້ງທຳອິດ ແລະເຂົ້າຮ່ວມກອງປະຊຸມປະຈຳປີຂອງເວທີປຶກສາຫາລືອາຊີໂປອາວ. ທ່ານ ສີຈິ້ນຜິງ ກ່າວວ່າ, ທ່ານປະທານາທິບໍດີໄດ້ນຳພາທ່ານນາຍົກລັດຖະມົນຕີ ເຄີສ ແລະລັດຖະມົນຕີຫຼາຍທ່ານ ປະກອບເປັນຄະນະຜູ້ແທນຂະໜາດໃຫຍ່ລະດັບສູງ ມາຢ້ຽມຢາມຈີນ ເຊິ່ງເປັນຄັ້ງທຳອິດໃນປະຫວັດການໄປມາຫາສູ່ກັນລະຫວ່າງຈີນ-ໂອຕຼິສ ແລະສະແດງໃຫ້ເຫັນເຖິງຄວາມເອົາໃຈໃສ່ສູງຂອງທ່ານປະນາທິບໍດີເອງແລະລັດຖະບານໂອຕຼິສຕໍ່ການເສີມຂະຫຍາຍສາຍພົວພັນສອງປະເທດຢ່າງເຕັມສ່ວນ. ລັດຖະບານຊຸດໃໝ່ທີ່ນຳໂດຍທ່ານນາຍົກລັດຖະມົນຕີ ເຄີສ ໄດ້ລະບຸການເສີມຂະຫຍາຍການພົວພັນກັບຈີນຢ່າງຕັ້ງໜ້າ ແລະ ຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ໄວ້ໃນສັນຍາການບໍລິຫານການເມືອງເປັນຄັ້ງທຳອິດ ເຊິ່ງຈີນສະແດງຄວາມຊົມເຊີຍຕໍ່ເລື່ອງນີ້. ຈີນຍິນດີຮ່ວມກັບໂອຕຼິສ, ຂຸດຄົ້ນແລະປ່ອຍຄວາມສາມາດບົ່ມຊ້ອນໃນການຮ່ວມມືລະຫວ່າງສອງປະເທດພ້ອມກັນ, ຫວ່ານແນວພັນແຫ່ງມິດຕະພາບແລະການຮ່ວມມືໃຫ້ຫຼາຍກວ່າເກົ່າ ແລະສ້າງຄວາມຜາສຸກໃຫ້ແກ່ປະຊາຊົນສອງຊາດຫຼາຍກວ່າເກົ່າ.
ທ່ານ ວັນ ເດີ ເບເລນ ກ່າວວ່າ, ນັບແຕ່ດຳເນີນການປະຕິຮູບແລະໄຂປະຕູສູ່ພາຍນອກເປັນຕົ້ນມາ, ຈີນໄດ້ຮັບຜົນງານເສດຖະກິດພົ້ນເດັ່ນທີ່ບໍ່ເຄີຍມີມາກ່ອນ ແລະ ກໍໄດ້ອຳນວຍໂອກາດທີ່ສຳຄັນໃຫ້ແກ່ການຮ່ວມມືໂອຕຼິສ-ຈີນ. ການທີ່ສາຍພົວພັນສອງປະເທດໄດ້ຂະຫຍາຍກ້າວສູ່ລວງເລິກຢ່າງຕໍ່ເນື່ອງນັ້ນ ເປັນເລື່ອງທີ່ປິຕິຊົມຊື່ນຢ່າງຍິ່ງ. ໂອຕຼິສໄດ້ສຸມໃສ່ລົງເລິກການແລກປ່ຽນແລະຮ່ວມມືກັບຈີນໃນດ້ານເສດຖະກິດການຄ້າ, ການລົງທຶນ, ການຄົ້ນຄວ້າວິທະຍາສາດ, ການອະນຸລັກສິ່ງແວດລ້ອມ, ພະລັງງານສະອາດ, ວັດທະນະທຳ, ກິລາ ແລະຂົງເຂດອື່ນໆ. ໂອຕຼິສຊົມເຊີຍຢ່າງສູງຕໍ່ຈີນທີ່ໄດ້ເສີມຂະຫຍາຍບົດບາດທີ່ຕັ້ງໜ້າໃນວຽກງານທົ່ວໂລກ ເຊັ່ນການຮັບມືກັບການປ່ຽນແປງຂອງດິນຟ້າອາກາດເປັນຕົ້ນ, ຍິນດີເຮັດໃຫ້ການຕິດຕໍ່ພົວພັນແລະການປະສານງານລະຫວ່າງສອງປະເທດໃກ້ຊິດຂຶ້ນ. ຂະນະດຽວກັນ, ໂອຕຼິສຈະເປັນປະເທດປະທານໝູນວຽນຂອງສະຫະພາບເອີຣົບໃນເດືອນກໍລະກົດປີນີ້ ແລະຍິນດີເສີມຂະຫຍາຍບົດບາດທີ່ຕັ້ງໜ້າໃນການລົງເລິກການຮ່ວມມືເອີຣົບ-ຈີນ.
 |
