ຕາມຂ່າວCRI: ຕອນບ່າຍວັນທີ 9 ເມສານີ້, ທ່ານ ໂຣດຣີໂກ ດູເຕີເຕ ປະທານາທິບໍດີຟີລິບປິນໄດ້ອອກເດີນທາງຈາກດາວໍສ໌ໄປເຂົ້າຮ່ວມກອງປະຊຸມເວທີປຶກສາຫາລືອາຊີໂປອາວທີ່ຈັດຂຶ້ນຢູ່ແຂວງໄຫຫຼຳຈີນ. ກ່ອນຈະເດີນທາງ, ໃນການຖະແຫຼງຂ່າວທີ່ຈັດຂຶ້ນຢູ່ສະໜາມບິນ, ທ່ານ ດູເຕີເຕ ກ່າວວ່າ, ການພັດທະນາການພົວພັນທີ່ມີໄມຕີຈິດມິດຕະພາບລະຫວ່າງປະເທດຕົນກັບຈີນກໍ່ຄືບັນດາປະເທດໃນອາຊີເປັນທິດທາງບູລິມະສິດແຫ່ງການພັດທະນາຂອງຟີລິບປິນ.
ທ່ານ ດູເຕີເຕ ກ່າວວ່າ: ເສດຖະກິດຂອງພາກພື້ນອາຊີມີຄວາມສາມາດບົ່ມຊ້ອນດ້ານການພັດທະນາທີ່ໃຫຍ່ຫຼວງ, ປະເທດຕົນຄວນນຳໃຊ້ໂອກາດນີ້ເພີ່ມທະວີການຮ່ວມມືດ້ານເສດຖະກິດແລະການແລກປ່ຽນກັນດ້ານການຄ້າລະຫວ່າງຟີລິບປິນ-ປະເທດບ້ານໃກ້ເຮືອນຄຽງໃນອາຊີຕື່ມອີກ,ຮ່ວມກັນຊົມໃຊ້ໂອກາດການພັດທະນາ,ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ທ່ານກ່າວຕື່ມວ່າ: ຫວັງວ່າໃນໄລຍະກອງປະຊຸມເວທີປຶກສາຫາລືອາຊີໂປອາວຈະສາມາດໂຄສະນາເຜີຍແຜ່ຟີລິບປິນຕໍ່ບັນດາປະເທດອາຊີຕື່ມອີກ,ຊຸກຍູ້ການເຕີບໂຕດ້ານການຄ້າຂອງຟີລິບປິນພ້ອມທັງດຶງດູດການລົງທຶນເພື່ອພັດທະນາເສດຖະກິດສັງຄົມພາຍໃນປະເທດ.
ປັດຈຸບັນ, ຈີນເປັນຄູ່ຮ່ວມການຄ້າອັນດັບໜຶ່ງຂອງຟີລິບປິນ.ນອກນີ້,ທ່ານ ດູເຕີເຕ ກ່າວຕື່ມວ່າ: ການພົວພັນລະຫວ່າງສອງປະເທດໃນປັດຈຸບັນໄດ້ແຕກດອກອອກຜົນ. ຈີນເປັນທິດທາງບູລິມະສິດແຫ່ງການພັດທະນາການພົວພັນການຕ່າງປະເທດຂອງຟີລິບປິນ,ພາຍໃຕ້ຂອບການຮ່ວມມື "ໜຶ່ງແລວໜຶ່ງເສັ້ນທາງ", ຟີລິບປິນໄດ້ຮັບຜົນປະໂຫຍດຢ່າງຫຼວງຫຼາຍ.
 |
