ກອງປະຊຸມປະຈຳປີຂອງເວທີປຶກສາຫາລືອາຊີໂປອາວ 2018 ໄດ້ໄຂຂຶ້ນຢູ່ເມືອງໂປອາວແຂວງໄຫຫຼຳຈີນໃນວັນທີ 10 ເມສານີ້. ທ່ານ ສີຈິ້ນຜິງ ປະທານປະເທດຈີນໄດ້ເຂົ້າຮ່ວມພິທີໄຂກອງປະຊຸມແລະກ່າວປາຖະກະຖາ ສຳຄັນທີ່ມີຫົວຂໍ້ວ່າ: "ການເປີດປະຕູສູ່ພາຍນອກສ້າງຄວາມຈະເລີນຮຸ່ງເຮືອງຮ່ວມກັນ ການປະດິດສ້າງໃໝ່ນຳພາອະນາຄົດ". ຫຼັງຈາກນັ້ນ, ຜູ້ນຳຕ່າງປະເທດທີ່ເຂົ້າຮ່ວມກອງປະຊຸມໄດ້ກ່າວປາໄສວ່າ: ມາດຕະການແລະນະໂຍບາຍຕ່າງໆໃນການເປີດກວ້າງການເປີດປະຕູສູ່ພາຍນອກທີ່ຈີນວາງອອກນັ້ນໄດ້ເຮັດໃຫ້ຄົນຕື່ນເຕັ້ນໃຈ, ຈີນສືບຕໍ່ເດັດດ່ຽວຊຸກຍູ້ການປະຕິຮູບແລະເປີດປະຕູສູ່ພາຍນອກຈະເປັນຂ່າວດີຕໍ່ໂລກ, ເຊິ່ງຈະຊຸກຍູ້ການພັດທະນາແລະຄວາມຈະເລີນຮຸ່ງເຮືອງຮ່ວມກັນຂອງໂລກຢ່າງແຂງແຮງ.
ທ່ານ ອັນໂຕນີໂອ ກູເຕີເຣສ ເລຂາທິການໃຫຍ່ອົງການສະຫະປະຊາຊາດກ່າວວ່າ: ປີນີ້ເປັນປີການປະຕິຮູບແລະເປີດປະຕູສູ່ພາຍນອກຂອງຈີນຄົບຮອບ 40 ປີ, ພວກຂ້າພະເຈົ້າໄດ້ເຫັນວິວັດການພັດທະນາຂອງຈີນກໍ່ຄືວິວັດການພັດທະນາການພົວພັນລະຫວ່າງຈີນກັບໂລກ. ກອງປະຊຸມຄັ້ງນີ້ໄດ້ສ່ອງແສງໃຫ້ເຫັນເຖິງຄວາມມີຊີວິດຊີວາຂອງອາຊີທີ່ເພີ່ມທະວີຂຶ້ນເລື້ອຍໆ ແລະ ຈິດໃຈທີ່ຍຶດຖືທ່າທີເຫັນໄປໃນທາງທີ່ດີແລະກ້າວໄປໜ້າ, ທັງໄດ້ສະແດງໃຫ້ເຫັນເຖິງຄວາມພະຍາຍາມຂອງພວກເຮົາໃນການສ້າງຄູ່ຮ່ວມຊາຕາກຳມວນມະນຸດ.
ທ່ານ ໂຣດຣິໂກ ດູເຕີເຕ ປະທານາທິບໍດີຟີລິບປິນກ່າວວ່າ: ການສ້າງອາຊີແລະໂລກທີ່ຈະເລີນຮຸ່ງເຮືອງຍິ່ງຂຶ້ນນັ້ນແມ່ນຜົນປະໂຫຍດຮ່ວມຂອງພວກເຮົາ ແລະກໍ່ແມ່ນໜ້າທີ່ຮັບຜິດຊອບຮ່ວມຂອງພວກເຮົາ. ບັນດາປະເທດ ຄວນເພີ່ມທະວີການຮ່ວມມືເພື່ອບັນລຸຄວາມໃຝ່ຝັນທີ່ມີຄວາມຈະເລີນຮຸ່ງເຮືອງຮ່ວມກັນ.
ທ່ານ ລີສຽນລຸງ ນາຍົກລັດຖະມົນຕີສິງກະໂປກ່າວວ່າ:ສະພາບການພັດທະນາເສດຖະກິດຂອງຈີນດີກວ່າພາກພື້ນອື່ນຕົ້ນຕໍແມ່ນຍ້ອນການເປີດປະຕູສູ່ພາຍນອກ. ຜູ້ນຳຂອງຈີນໄດ້ບັນລະຍາຍຫຼັກໝັ້ນຂອງຈີນທີ່ສະໜັບສະໜູນລັດທິຫຼາຍຝ່າຍແລະການເປີດປະຕູສູ່ພາຍນອກມາຫຼາຍເທື່ອ, ທະນາຄານລົງທຶນພື້ນຖານໂຄງລ່າງອາຊີແລະຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ກໍ່ເປັນການປະກອບສ່ວນທີ່ສຳຄັນຂອງຈີນຕໍ່ຄວາມຈະເລີນຮຸ່ງເຮືອງຂອງພາກພື້ນ.
ທ່ານນາງ ຄຣິສຕິນ ລາກາດ ຜູ້ອຳນວຍການໃຫຍ່ອົງການກອງທຶນເງິນຕາສາກົນຫຼື IMF ກ່າວວ່າ: ໃນຄຳປາໄສ, ທ່ານ ສີຈິ້ນຜິງ ປະທານປະເທດຈີນໄດ້ລິເລີ່ມການປະດິດສ້າງໃໝ່,ການກວມລວມ,ການເປີດປະຕູສູ່ພາຍນອກແລະທັດສະນະຄະຕິອື່ນໆ,ແລະໄດ້ສະເໜີມາດຕະການກ່ຽວກັບການເປີດປະຕູສູ່ພາຍນອກໃນຂົງເຂດຕ່າງໆເຊັ່ນ: ການເງິນ,ການປະກັນໄພ,ລົດແລະອື່ນໆ, ບັນດາປະເທດຄວນໃຫ້ຄຳຕອບດ້ວຍທ່າທີທີ່ຕິດແທດຕົວຈິງເຊັ່ນດຽວກັນ. ທ່ານນາງລາກາດກ່າວຕື່ມວ່າ, ອາຊີໄດ້ປະກອບສ່ວນຕໍ່ການເຕີບໂຕເສດຖະກິດຂອງໂລກ 2 ສ່ວນ 3, ມີຄວາມໝາຍສຳຄັນຕໍ່ເສດຖະກິດໂລກ. ບັນດາປະເທດຄວນເປີດກວ້າງການຄ້າຕື່ມອີກ, ດັ່ງນັ້ນການປະດິດສ້າງໃໝ່ຈຶ່ງຈະສາມາດຊົມໃຊ້ຮ່ວມກັນຕື່ມອີກ.
 |
