ວັນທີ 10 ເມສາ 2018ນີ້, ທີ່ສະໜາມຍິງປືນຫຼັກ 27 ກອງທັບປະຊາຊົນລາວ ນະຄອນຫຼວງວຽງຈັນ, ໄດ້ຈັດພິທີມອບ-ຮັບໂຄງການຊ່ວຍເຫຼືອກໍ່ສ້າງ ສະໜາມແຂ່ງຂັນຍິງປືນອາວຸດເບົາອາຊຽນ ກອງທັບປະຊາຊົນລາວທີ່ຈັດໂດຍກອງທັບປະຊາຊົນລາວ ໂດຍການເປັນປະທານຮ່ວມລະຫວ່າງທ່ານ ພົ.ທ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ແລະ ທ່ານ ຫວາງ ເຫວີນທຽນ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ມີບັນດາການນໍາທັງຝ່າຍລາວແລະຈີນ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ໃນໂອກາດນີ້, ທ່ານ ຫວາງ ເຫວີນທຽນ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ກ່າວວ່າ: ການດໍາເນີນໂຄງການີ້ສໍາເລັດຜົນສະແດງໃຫ້ເຫັນວ່າກອງທັບຈີນໄດ້ສະໜັບສະໜູນການກໍ່ສ້າງທະຫານ ແລະ ຮ່ວມມືກັບກອງທັບປະຊາຊົນລາວ, ທັງເປັນສັນຍາລັກແຫ່ງການຮ່ວມມືມິດຕະພາບລະຫວ່າງກອງທັບຂອງສອງປະເທດ ເຊິ່ງຈະໄດ້ຍົກລະດັບການຮ່ວມມືໃຫ້ສູງຂຶ້ນເລື້ອຍໆ.
ໂຄງການນີ້ຍັງເປັນຂອງຂວັນອັນຈິງໃຈມອບໃຫ້ແກ່ກອງທັບລາວເພື່ອສະເຫຼີມສະຫຼອງການສ້າງຕັ້ງສາຍພົວພັນການທູດສອງປະເທດຄົບຮອບ 57 ປີ ແລະ ການສ້າງຕັ້ງກອງທັບ ປະຊາຊົນລາວຄົບຮອບ 70 ປີ.
ຝ່າຍຈີນຈະສືບຕໍ່ໃຫ້ຄວາມສໍາຄັນຕໍ່ການຮ່ວມມືຂອງສອງກອງທັບລາວ-ຈີນ, ຈະຊ່ວຍເຫຼືອກອງທັບລາວຕາມຄວາມສາມາດຂອງຕົນຢ່າງສະເໜີຕົ້ນສະເໝີປາຍ ເພື່ອຊຸກຍູ້ມິດຕະພາບອັນເປັນມູນເຊື້ອລາວ-ຈີນ, ພັດທະນາແບບຮອບດ້ານ,ມີປະສິດທິພາບ ແລະ ໝັ້ນຄົງຢ່າງບໍ່ຢຸດຢັ້ງ.
ທ່ານ ພົ.ທ ສຸວອນ ເລືອງບຸນມີ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການ ກອງທັບປະຊາຊົນລາວ ກ່າວວ່າ: ການສ້າງສະໜາມຍິງປືນໃນຄັ້ງນີ້, ແມ່ນການປະກອບສ່ວນອັນສໍາຄັນເຂົ້າໃນການເສີມສ້າງສາຍພົວພັນ ມິດຕະພາບ, ສາມັກຄີ ແລະ ການຮ່ວມມືຮອບດ້ານລະຫວ່າງສອງຊາດ,ສອງກອງທັບລາວ-ຈີນ ແລະ ທັງເປັນການຍົກລະດັບຄຸນນະພາບໃນການອົບຮົມຫັດແອບນັກກິລາຍິງປືນຂອງກອງທັບປະຊາຊົນລາວ ໃຫ້ມີຄຸນນະພາບສູງທຽບເທົ່າກັບສາກົນ ແລະ ພາກພື້ນ.
ທ່ານ ພັ.ອ ຫຼິວ ເປິ່ງ ຮອງຫົວໜ້າກົມກໍ່ສ້າງ ກົມຮັບປະກັນພາລາທິການກອງທັບປົດປ່ອຍປະຊາຊົນຈີນ ກ່າວວ່າ: ໂຄງການການຊ່ວຍເຫຼືອສະໜາມແຂ່ງຍິງປືນອາວຸດເບົາອາຊຽນຂອງກອງທັບປະຊາຊົນລາວ ໄດ້ດໍາເນີນການກໍ່ສ້າງຢ່າງຂຸ້ນຂ້ຽວແລະສ້າງສໍາເລັດໃນໄລຍະເວລາພຽງ 15 ເດືອນ, ລວມເນື້ອທີ່ທັງໝົດ 860.000 ຕາແມັດ, ໂດຍປະກອບມີເຂດຍິງປືນ ແລະ ເຂດປະກອບອຸປະກອນ ເຊິ່ງມີເນື້ອທີ່ປະມານ 20.000 ຕາແມັດ, ການກໍ່ສ້າງດັ່ງກ່າວໃຊ້ເວລາ 445 ມື້. ຫຼັງຈາກສະໜາມຍິງປືນແຫ່ງນີ້ໄດ້ເປີດນໍາໃຊ້ກໍ່ຈະເປັນຜົນດີໃນການຝຶກຊ້ອມເພື່ອຍົກລະດັບຄຸນນະພາບດ້ານວິຊາສະເພາະຂອງທະຫານກອງທັບປະຊາຊົນລາວ, ພ້ອມນັ້ນກໍ່ຍັງເປັນການສະໜອງສະຖານທີ່ຮອງຮັບໃຫ້ແກ່ການແຂ່ງຂັນຍິງປືນຂອງ 10 ປະເທດອາຊຽນອີກດ້ວຍ.
ຫຼັງຈາກນັ້ນ, ໄດ້ມີພິທີລົງນາມມອບ-ຮັບໂຄງການດັ່ງກ່າວ, ຕາງໜ້າຝ່າຍລາວໂດຍ ພົ.ທ ສຸວອນ ເລືອງບຸນມີ ຮອງລັດຖະມົນຕີກະຊວງປ້ອງກັນປະເທດ, ຕາງໜ້າຝ່າຍຈີນໂດຍ ທ່ານ ຫວາງ ເຫວີນທ່ຽນ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ.