ທ່ານ ສີຈິ້ນຜິງ ປະທານປະເທດຈີນ ໄດ້ພົບປະກັບທ່ານ ໂຣດຣິໂກ ດູເຕີເຕ ປະທານາທິບໍດີຟິລິປິບຢູ່ຫໍຮັບແຂກເມືອງໂປອາວແຂວງໄຫຫຼຳໃນວັນທີ 10 ເມສານີ້.
ໂອກາດດັ່ງກ່າວ, ທ່ານ ສີຈິ້ນຜິງ ຊີ້ວ່າ, ນັບແຕ່ທ່ານ ດູເຕີເຕ ຂຶ້ນຮັບຕຳແໜ່ງປະທານາທິບໍດີເປັນຕົ້ນມາ, ສາຍພົວພັນຈີນ-ຟິລິບປິນ ໄດ້ເປີດໜ້າໃໝ່. ຈີນຍິນດີຮ່ວມກັບຟິລິບປິນ, ຍຶດໝັ້ນທິດທາງໃຫຍ່ແຫ່ງມິດຕະພາບຖານບ້ານໃກ້ເຮືອນຄຽງ, ກຳນົດເປົ້າໝາຍໃຫຍ່ແຫ່ງການພັດທະນາພ້ອມກັນ, ເສີມຂະຫຍາຍສະຕິປັນຍາໃຫຍ່ແຫ່ງການແກ້ໄຂຄວາມຂັດແຍ້ງກັນຢ່າງເໝາະສົມ ແລະຄ້ຳປະກັນໃຫ້ສາຍພົວພັນຈີນ-ຟິລິບປິນຂະຫຍາຍໄປຕາມທິດທາງທີ່ຖືກຕ້ອງຢ່າງປອດໄສ, ໜັກແໜ້ນແລະສະເໝີຕົ້ນສະເໝີປາຍ.
ທ່ານ ສີຈິ້ນຜິງ ກ່າວເນັ້ນວ່າ, ຍາມໃດ, ຈີນກໍກຳນົດເອົາອາຊຽນເປັນທິດທາງບູລິມະສິດດ້ານການຕ່າງປະເທດກັບປະເທດອ້ອມຂ້າງ, ປີນີ້ເປັນປີທີ່ຈີນແລະອາຊຽນສ້າງຕັ້ງສາຍພົວພັນຄູ່ຮ່ວມຍຸດທະສາດຄົບຮອບ 15 ປີ ແລະເປັນປີປະດິດສ້າງໃໝ່ຈີນ-ອາຊຽນ, ຟິລິບປິນຈະໝູນວຽນມາເປັນປະເທດປະສານງານການພົວພັນຈີນ-ອາຊຽນ, ຈີນຍິນດີຮັດແໜ້ນການຕິດຕໍ່ພົວພັນແລະການປະສານສົມທົບກັບຟິລິບປິນ, ຊຸກຍູ້ການພົວພັນຈີນ-ອາຊຽນແລະການຮ່ວມມືພາກພື້ນອາຊີຕາເວັນອອກໃຫ້ຂະຫຍາຍຕົວຢ່າງບໍ່ຢຸດຢັ້ງ.
ທ່ານ ດູເຕີເຕ ກ່າວວ່າ, ປັດຈຸບັນ, ສາຍພົວພັນຟິລິບປິນ-ຈີນໄດ້ຮັກສາທ່ວງທ່າຂະຫຍາຍຕົວເປັນຢ່າງດີ. ຟິລິບປິນຂໍຂອບໃຈຈີນຢ່າງສູງທີ່ຊ່ວຍເຫຼືອແລະສະໜັບສະໜູນການພັດທະນາເສດຖະກິດ-ສັງຄົມ ແລະ ຍົກຄວາມສາມາດໃນການຕ້ານລັດທິກໍ່ການຮ້າຍແລະປົກປັກຮັກສາສະຖຽນລະພາບຂອງຟິລິບປິນໃຫ້ສູງຂຶ້ນ. ຟິລິບປິນຍິນດີເຂົ້າຮ່ວມການສ້າງເສັ້ນທາງສາຍໄໝທາງທະເລສະຕະວັດທີ 21 ພ້ອມກັນຢ່າງຕັ້ງໜ້າ, ຮັດແໜ້ນການຮ່ວມມືກັບຈີນໃນທຸກຂົງເຂດ. ຟິລິບປິນຍິນດີຮ່ວມກັບຈີນ ສືບຕໍ່ພະຍາຍາມປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້ໂດຍຜ່ານການແລກປ່ຽນແລະປຶກສາຫາລືກັນລະຫວ່າງສອງຝ່າຍ, ເຮັດໃຫ້ທະເລຈີນໃຕ້ກາຍເປັນຂົງເຂດການຮ່ວມມືລະຫວ່າງສອງປະເທດ. ຟິລິບປິນຈະເປັນປະເທດປະສານງານການພົວພັນຈີນ-ອາຊຽນ, ຍິນດີຕັ້ງໜ້າຊຸກຍູ້ການຮ່ວມມືລະຫວ່າງອາຊຽນກັບຈີນໃຫ້ກ້າວສູ່ລວງເລິກ.
