ຄະນະກຳມະການການທະຫານສູນກາງຈີນ ໄດ້ຈັດການສວນສະໜາມເທິງທະເລຢ່າງຄຶກຄື້ນຢູ່ເຂດທະເລຈີນໃຕ້ໃນຕອນເຊົ້າວັນທີ 12 ເມສານີ້ ເພື່ອສະແດງໂສມໜ້າໃໝ່ຂອງກອງທັບເຮືອປະຊາຊົນ. ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນ ໄດ້ກວດແຖວກອງທະຫານ ແລະ ກ່າວປາໄສສຳຄັນ ໂດຍເນັ້ນວ່າ, ໃນຂະບວນການຍຸກໃໝ່, ໃນການສູ້ຮົບເພື່ອບັນລຸຄວາມຈະເລີນຮຸ່ງເຮືອງຄືນໃໝ່ອັນຍິ່ງໃຫຍ່ຂອງປະຊາຊາດຈີນ, ໜ້າທີ່ການສ້າງກອງທັບເຮືອປະຊາຊົນທີ່ເຂັ້ມແຂງນັ້ນ ບໍ່ເຄີຍຮີບດ່ວນຄືຊູ່ມື້ນີ້. ຕ້ອງຜັນຂະຫຍາຍແນວຄິດສ້າງກອງທັບໃຫ້ເຂັ້ມແຂງຂອງພັກໃນຍຸກໃໝ່ຢ່າງເລິກເຊິ່ງ, ຍຶດໝັ້ນການສ້າງກອງທັບດ້ວຍການເມືອງ, ການສ້າງຄວາມເຂັ້ມແຂງຂອງກອງທັບດ້ວຍການປະຕິຮູບ, ການສ້າງຄວາມຈະເລີນຮຸ່ງເຮືອງຂອງກອງທັບດ້ວຍວິທະຍາສາດເຕັກໂນໂລຊີ ແລະ ການປົກຄອງກອງທັບຕາມກົດໝາຍ, ເລັ່ງລັດຂະບວນການຫັນກອງທັບເຮືອໃຫ້ທັນສະໄໝຢ່າງເດັດດ່ຽວໜຽວແໜ້ນ, ຊ່າງປະດິດສ້າງໃໝ່, ກ້າລື່ນກາຍຄົນຮຸ່ນກ່ອນ, ພະຍາຍາມສ້າງກອງທັບເຮືອປະຊາຊົນໃຫ້ເປັນກອງທັບເຮືອລະດັບໜຶ່ງໃນໂລກຢ່າງຮອບດ້ານ.
ຫຼັງຈາກການສວນສະໜາມສິ້ນສຸດລົງແລ້ວ, ທ່ານ ສີຈິ້ນຜິງ ໄດ້ກວດກາສະພາບການຝຶກຊ້ອມການບິນຂອງຍົນຮົບ J-15 ຢູ່ເທິງກຳປັ່ນບັນທຸກເຮືອບິນລຽວນິງ.
