ທ່ານ ລີຊຽນລົງ ນາຍົກລັດຖະມົນຕີສິງກະໂປ ໄດ້ກ່າວໃນໂອກາດເຂົ້າຮ່ວມກອງປະຊຸມເວທີປຶກສາຫາລື "ເຂົ້າໃຈອາຊີ" ຈີນ DBS 2018 ຢູ່ກຳແພງນະຄອນຊຽງໄຮຈີນເມື່ອວັນທີ 12 ເມສານີ້ວ່າ, ການເຊື່ອມຈອດກັນດ້ານການບໍລິການການທະນາຄານ ໄດ້ກາຍເປັນຂົງເຂດຈຸດໜັກໃນການຮ່ວມມືສອງຝ່າຍສິງກະໂປ-ຈີນ, ສິງກະໂປສະໜັບສະໜູນການຫັນເງິນຢວນຈີນໃຫ້ເປັນເງິນຕາສາກົນຢ່າງແຂງແຮງ, ສ່ວນໂຄງການຮ່ວມມືສອງຝ່າຍແລະພາກພື້ນຈຳນວນໜຶ່ງທີ່ສອງປະເທດສິງກະໂປ-ຈີນຮ່ວມກັນຊຸກຍູ້ນັ້ນ ຈະສ້າງໂອກາດໃຫ້ແກ່ວິສາຫະກິດສອງປະເທດແລະພາກພື້ນອາຊີຫຼາຍກວ່າເກົ່າ.
ທ່ານ ລີຊຽນລົງ ກ່າວຕື່ມວ່າ, ຈີນເປັນຄູ່ການຄ້າແລະແຫຼ່ງນັກທ່ອງທ່ຽວທີ່ໃຫຍ່ທີ່ສຸດຂອງສິງກະໂປ, ແລະສິງກະໂປກໍໄດ້ກາຍເປັນແຫຼ່ງທຶນຕ່າງງປະເທດທີ່ໃຫຍ່ທີ່ສຸດຂອງຈີນ ແລະເປັນໜຶ່ງໃນສູນຊຳລະສະສາງເງິນຢວນຈີນຢູ່ຕ່າງປະເທດທີ່ໃຫຍ່ທີ່ສຸດ. ເລີ່ມແຕ່ເດືອນມິຖຸນາປີ 2016 ເປັນຕົ້ນມາ, ອົງການຄຸ້ມຄອງການທະນາຄານສິງກະໂປໄດ້ຈັດເອົາເງິນຢວນຈີນເຂົ້າໃນຄັງສຳຮອງເງິນຕາຕ່າງປະເທດຂອງທາງການສິງກະໂປ, "ນີ້ບໍ່ພຽງແຕ່ເປັນການຢືນຢັນຕໍ່ຄວາມສຳຄັນຂອງເງິນຢວນຈີນເທົ່ານັ້ນ, ຍັງໄດ້ສະແດງໃຫ້ເຫັນເຖິງຄວາມໝັ້ນໃຈຂອງພວກເຮົາຕໍ່ອະນາຄົດຂອງເງິນຢວນຈີນ."
ທ່ານ ລີຊຽນລົງ ກ່າວເປັນພິເສດວ່າ, ການພົວພັນຮ່ວມມືລະຫວ່າງລັດຖະບານສອງປະເທດສິງກະໂປແລະຈີນກໍໄດ້ກ້າວໄປໜ້າພ້ອມກັບຍຸກສະໄໝ ເຊິ່ງສາມາດປະສານສົມທົບກັນໂດຍອີງຕາມຄວາມຕ້ອງການການພັດທະນາໃນໄລຍະຕ່າງກັນແລະທ່າແຮງຂອງສອງຝ່າຍ.