ຕາມຂ່າວCRI：ວັນທີ 14 ເມສານີ້, ສະພາຄວາມໝັ້ງຄົງອົງການສະຫະປະຊາຊາດບໍ່ໄດ້ຮັບຮອງຮ່າງມະຕິທີ່ມີຈຸດປະສົງເພື່ອກ່າວປະນາມຕໍ່ການໂຈມຕີທາງການທະຫານຕໍ່ຊີຣີທີ່ສະເໜີໂດຍຣັດເຊຍ.
ໃນມື້ດຽວກັນ, ທ່ານນາງ ຮວ້າ ຊູ່ນ ຢີງ, ໂຄສົກກະຊວງການຕ່າງປະເທດຈີນໄດ້ກ່າວກ່ຽວກັບເລື່ອງທີ່ອາເມລິກາ, ອັງກິດ, ຝຣັ່ງຮ່ວມກັນໂຈມຕີທາງອາກາດຕໍ່ຊີຣີວ່າ, ຈີນຄັດຄ້ານການໃຊ້ກຳລັງອາວຸດໃນການພົວພັນສາກົນມາໂດຍຕະຫຼອດ, ມີເຈດຈຳນົງໃຫ້ເຄົາລົບອະທິປະໄຕ, ເອກະລາດແລະຜືນແຜ່ນດິນທີ່ຄົບຖ້ວນຂອງແຕ່ລະປະເທດ. ການເຄື່ອນໄຫວທາງການທະຫານແຕ່ຝ່າຍດຽວໃດໆທີ່ໃຊ້ໂດຍບໍ່ໄດ້ຮັບມີການອະນຸຍາດຈາກສະພາຄວາມໝັ້ງຄົງອົງການສະຫະປະຊາຊາດລ້ວນແຕ່ຝ່າຝືນຕໍ່ວັດຖຸປະສົງແລະຫຼັກການຂອງ "ກົດບັດສະຫະປະຊາຊາດ", ຝ່າຝືນຕໍ່ຫຼັກການແລະກົດລະບຽບພື້ນຖານຂອງກົດໝາຍສາກົນ, ກໍ່ຈະເພີ່ມຕື່ມປັດໄຈຢ່າງທີ່ສັບສົນຕໍ່ການແກ້ໄຂບັນຫາຊີຣີ. ຈີນຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງກັບຄືນສູ່ຂອບກົດໝາຍສາກົນ,ແກ້ໄຂບັນຫາດ້ວຍການເຈລະຈາແລະປຶກສາຫາລືກັນ.
ກ່ຽວກັບຄວາມເວົ້າທີ່ວ່າການໂຈມຕີທາງການທະຫານທີ່ດຳເນີນໂດຍອາເມລິກາ, ອັງກິດແລະຝຣຍ່ງແມ່ນແນໃສ່ເຫດການຫຼອນໂຈມຕີດ້ວຍອາວຸດເຄມີທີ່ໄດ້ເກີດຂຶ້ນຢູ່ຊີຣີ, ທ່ານນາງຮວ້າ ຊູ່ນ ຢີງກ່າວເນັ້ນວ່າ, ຈີນເຫັນວ່າ, ຄວນດຳເນີນການສຳຫຼວດຢ່າງຮອບດ້ານ, ຍຸຕິທຳແລະພາວະວິໄສຕໍ່ເຫດການທີ່ຖືກສົງໄສເປັນການຫຼອນໂຈມຕີດ້ວຍອາວຸດເຄມີທີ່ເກີດຂຶ້ນຢູ່ຊີຣີ, ແລ້ວມີຜົນທີ່ເຊື່ອໃຈໄດ້ແລະຜ່ານການກວດສອບຂອງປະຫວັດສາດໄດ້. ກ່ອນນີ້, ຝ່າຍຕ່າງໆບໍ່ຄວນທຳການຕັດສິນລ່ວງໜ້າ. ຈີນເຫັນວ່າ, ການແກ້ໄຂທາງການເມືອງແມ່ນທາງອອກພຽງສາຍດຽວຂອງບັນຫາຊີຣີ. ຝ່າຍຕ່າງໆທີ່ກ່ຽວຂອງຂ້ອງປະຊາຄົມໂລກຄວນສືບຕໍ່ສະໜັບສະໜູນບົດບາດທີ່ເປັນຊ່ອງທາງຕົ້ນຕໍດ້ານການໄກ່ເກ່ຍຂອງອົງການສະຫະປະຊາຊາດ, ພະຍາຍາມຮ່ວມຢ່າງບໍ່ລົດລະເພື່ອຊຸກຍູ້ໃຫ້ບັນຫາຊີຣີໄດ້ຮັບການແກ້ໄຂຢ່າງເໝະສົມໃນທີ່ສຸດ.
ທ່ານບາຊາ ອາຊັດ, ປະທານາທິບໍດີຊີຣີກ່າວໃນວັນທີ 14 ເມສານີ້ວ່າ, ການໂຈມຕີທາງການທະຫານຕໍ່ຊີຣີທີ່ນຳໂດຍອາເມລິກາສະແດງໃຫ້ເຫັນວ່າຄວາມເຈດຕະນາຂອງປະເທດຝ່າຍຕາເວັນຕົກຢູ່ຊີຣີບໍ່ໄດ້ປະສົບຜົນສຳເລັດ.
ທ່ານວຼາດີເມຍ ປູຕີນ, ປະທານາທິບໍດີຣັດເຊຍກ່າວໃນວັນທີ 14 ເມສານີ້ວ່າ, ການຫຼອນໂຈມຕີທາງການທະຫານຕໍ່ຊີຣີທີ່ກໍ່ໂດຍອາເມລິກາແລະສັນນິບາດຂອງອາເມລິກາແມ່ນການກະທຳຂອງການຮຸກຮານ, ຣັດເຊຍກ່າວປະນາມຢ່າງຮຸນແຮງກ່ຽວກັບເລື່ອງນີ້.
ທ່ານໄມຄ ເປນຊີ, ຮອງປະທານາທິບໍດີອາເມລິກາກ່າວຢູ່ນະຄອນຫຼວງລີມາຂອງເປຣູວ່າ, ລັດຖະບານອາເມລິກາໄດ້ກຽມພ້ອມໃນການກໍ່ການຫຼອນໂຈມຕີອີກເທື່ອໃໝ່ຕໍ່ຊີຣີ, ແລະຈະຮັບມືກັບການກະທຳຂອງການແກ້ແຄ້ນທີ່ອາດຈະກໍ່ໂດຍຊີຣີແລະສັນນິບາດຂອງຊີຣີ.
ຫວ່າງກ່ອນນີ້ບໍ່ດົນ, ຂ່າວແຈ້ງວ່າຢູ່ນະຄອນຫຼວງດາມາສຂອງຊີຣີໄດ້ເກີດເຫດການຫຼອນໂຈມຕີດ້ວຍອາວຸດເຄມີ. ພາຍຫຼັງເຫດການດັ່ງກ່າວໄດ້ເກີດຂຶ້ນ, ທ່ານໂດນານ ທຣັມ, ປະທານາທິບໍດີອາເມລິກາໄດ້ຂົ່ມຂູ່ຫຼາຍເທື່ອວ່າຈະນຳໃຊ້ການກະທຳດ້ວຍອາວຸດຕໍ່ລັດຖະບານຊີຣີ. ໃນເວລາຕອນແລງວັນທີ 13 ເມສານີ້່ຕາມເວລາພາກຕາເວັນອອກຂອງອາເມລິກາ, ທ່ານໂດນານ ທຣັມປະກາດວ່າ, ໄດ້ອອກຄຳສັ່ງໃຫ້ທະຫານອາເມກາຮ່ວມກັນກັບອັງກິດ, ຝຣັ່ງກໍ່ "ຫຼອມໂຈມຕີຢ່າງຄັກແນ່" ຕໍ່ສິ່ງກໍ່ສ້າງການທະຫານຂອງຊີຣີ.
