ທ່ານເຄວິນ ໄມເຄີນ ຣຸດ ອະດີດນາຍົກລັດຖະມົນຕີອົສຕຣາລີ ຫົວໜ້າສະຖາບັນຄົ້ນຄວ້ານະໂຍບາຍ ສະມາຄົມອາຊີອາເມລິກາ ກ່າວໃນວັນທີ 14 ເມສານີ້ວ່າ: ຕະຫຼອດ 40 ປີແຫ່ງການປະຕິຮູບແລະເປີດປະຕູສູ່ພາຍນອກເປັນຕົ້ນມາ, ຈີນຍາດໄດ້ຜົນງານໜ້າຊື່ນຊົມ ເຊິ່ງໃນນີ້ຜົນງານດີເດັ່ນກໍຄື ສາມາດເຮັດໃຫ້ຊາວຈີນຫຼາຍຮ້ອຍລ້ານຄົນຫຼຸດພົ້ນອອກຈາກຄວາມທຸກຍາກຢ່າງສຳເລັດຜົນ.
ທັງນີ້ ທ່ານເຄວິນ ໄມເຄີນ ຣຸດ ໄດ້ໃຫ້ສຳພາດຕໍ່ນັກຂ່າວຂ່າວສານຊິນຮວາໃນຕອນບ່າຍຂອງວັນດັ່ງກ່າວ ຂະນະທີ່ເຂົ້າຮ່ວມກອງປະຊຸມສຸດຍອດຈີນ-ອາເມລິກາເປນວໍຕອນຢູ່ນະຄອນຟີລາເດວເຟຍ ອາເມລິກາ ໂດຍກ່າວວ່າ: ຕົນເປັນ "ພະນັກງານອາວຸໂສ" ທີ່ໄດ້ຮຽນພາສາແລະວັດທະນະທຳ-ປະຫວັດສາດຈີນ ແລະ ໂຊກດີທີ່ໄດ້ເປັນຜູ້ເຫັນກັບຕາຕໍ່ການປະຕິຮູບແລະເປີດປະຕູສູ່ພາຍນອກ ທີ່ສົ່ງຜົນເຮັດໃຫ້ຈີນມີການປ່ຽນແປງຢ່າງເລິກເຊິ່ງ.
ທ່ານເຄວິນ ໄມເຄີນ ຣຸດ ໄດ້ເວົ້າດ້ວຍພາສາຈີນທີ່ຫຼຽນໄຫຼດີ ກັບນັກຂ່າວວ່າ: ການຫຼຸດພົ້ນອອກຈາກຄວາມທຸກຍາກ ມັນເວົ້າງ່າຍ ແຕ່ພັດຍາກທີ່ຈະປະສົບຜົນສຳເລັດ. ຈີນດຳເນີນການປະຕິຮູບ ແລະເປີດປະຕູສູ່ພາຍນອກຕະຫຼອດ 40 ປີມານີ້ ພັດສາມາດເຮັດໃຫ້ປະຊາຊົນກວ່າ 700 ລ້ານຄົນຫຼຸດພົ້ນອອກຈາກຄວາມທຸກຍາກໄດ້ ເຊິ່ງເປັນຜົນງານດີເດັ່ນໃນຂະບວນການປະຕິຮູບແລະເປີດປະຕູສູ່ພາຍນອກຂອງຈີນ ແລະຄວນເປັນຜົນງານທີ່ຊາວຈີນຮູ້ສຶກພາກພູມໃຈ.