ວັນທີ 15 ເມສານີ້, ທ່ານ ວາງຢີ້ ທີ່ປຶກສາແຫ່ງລັດ, ທັງເປັນລັດຖະມົນຕີກະຊວງການຕ່າງປະເທດຈີນ ໄດ້ຢ້ຽມຢາມຍີ່ປຸ່ນຢ່າງເປັນທາງການ ແລະໄດ້ພົບປະເຈລະຈາກັບທ່ານ ທາໂຣໂຄໂນ ລັດຖະມົນຕີກະຊວງການຕ່າງປະເທດຍີ່ປຸ່ນ.
ໂອກາດດັ່ງກ່າວ, ທ່ານ ວາງຢີ້ ກ່າວວ່າ, ສາຍພົວພັນຈີນ-ຍີ່ປຸ່ນ ໄດ້ປາກົດມີທ່ວງທ່າປັບປຸງດີຂຶ້ນ, ພ້ອມກັນນັ້ນ ກໍມີປັດໄຈທີ່ສັບສົນແລະອ່ອນໄຫວຈຳນວນໜຶ່ງ. ສອງຝ່າຍຄວນ "ບໍ່ລືມອຸດົມການແຕ່ຫົວທີ, ບູລະນະພື້ນຖານ, ຖືປະຫວັດສາດເປັນແວ່ນແຍງ ແລະຮ່ວມກັນສ້າງອະນາຄົດ" ເພື່ອຊຸກຍູ້ສາຍພົວພັນສອງປະເທດໃຫ້ຂະຫຍາຍໄປຕາມທິດທາງທີ່ຖືກຕ້ອງຢ່າງໜັກແໜ້ນແລະຍາວນານ. ສອງປະເທດຄວນເຄົາລົບຈິດໃຈຫຼັກການຂອງເອກະສານການເມືອງ 4 ສະບັບ, ປະຕິບັດຕໍ່ປະຫວັດສາດຢ່າງຖືກຕ້ອງ ແລະເຄົາລົບຫຼັກການປະເທດຈີນດຽວ. ຕ້ອງສອດຄ່ອງກັບສະຖານະການໃໝ່, ສຸມໃສ່ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນຂົງເຂດປະຢັດພະລັງງານ, ອະນຸລັກສິ່ງແວດລ້ອມ, ປະດິດສ້າງວິທະຍາສາດເຕັກນິກໃໝ່, ການຜະລິດລະດັບສູງ, ການເງິນ, ການທະນາຄານ, ເສດຖະກິດຊົມໃຊ້ຮ່ວມ, ການປິ່ນປົວພະຍາດ ແລະການຮັກສາສຸຂະພາບເປັນຕົ້ນ. ຄວນດຳເນີນການແລກປ່ຽນວັດທະນະທຳທີ່ກວ້າງຂວາງກວ່າເກົ່າ, ສ້າງພື້ນຖານແຫ່ງມິດຕະພາບລະຫວ່າງປະຊາຊົນສອງຊາດໃຫ້ໝັ້ນຄົງຢ່າງບໍ່ຢຸດຢັ້ງ. ຄວນຮ່ວມກັນຊຸກຍູ້ຂະບວນການຫັນເສດຖະກິດພາກພື້ນໃຫ້ເປັນເອກະພົບດຽວ, ຊຸກຍູ້ການຮ່ວມມືລະຫວ່າງສາມຝ່າຍຄື ຈີນ, ຍີ່ປຸ່ນ ແລະ ສ.ເກົາຫຼີ. ຄວນປົກປ້ອງເສດຖະກິດໂລກາພິວັດແລະໂຄງປະກອບການຄ້າເສລີ, ຮ່ວມກັນສຸມໃສ່ການສ້າງປະຊາຄົມຮ່ວມຊາຕາກຳຂອງອາຊີກໍຄືຂອງມວນມະນຸດ. ຈີນຊົມເຊີຍແລະຍິນດີຄົ້ນຄວ້າບັນຫາທີ່ຍີ່ປຸ່ນເຂົ້າຮ່ວມການສ້າງ "ໜຶ່ງແລວໜຶ່ງເສັ້ນທາງ" ເພື່ອເຮັດໃຫ້ກາຍເປັນຈຸດເຕີບໂຕໃໝ່ຂອງການຮ່ວມມືລະຫວ່າງສອງປະເທດ.
ທ່ານ ທາໂຣໂຄໂນ ກ່າວວ່າ, ການຢ້ຽມຢາມຍີ່ປຸ່ນຂອງທ່ານວາງຢີ້ຄັ້ງນີ້ ເປັນຂີດໝາຍສຳຄັນທີ່ສາຍພົວພັນຍີ່ປຸ່ນ-ຈີນໄດ້ຮັບການປັບປຸງໃຫ້ດີຂຶ້ນ, ປະເທດຕົນຫວັງຢາກກຳໂອກາດໃນປັດຈຸບັນ, ຊຸກຍູ້ສາຍພົວພັນສອງປະເທດໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ. ປະເທດຕົນຄອງຄອຍຢ່າງອົບອຸ່ນແລະຍິນດີຕ້ອນຮັບທ່ານນາຍົກລັດຖະມົນຕີ ຫຼີເຄີ້ສຽງ ເດີນທາງເຂົ້າຮ່ວມກອງປະຊຸມຜູ້ນຳຈີນ, ຍີ່ປຸ່ນ ແລະສ.ເກົາຫຼີຢູ່ຍີ່ປຸ່ນ ແລະຢ້ຽມຢາມຍີ່ປຸ່ນຢ່າງເປັນທາງການ. ຍີ່ປຸ່ນຈະຍຶດໝັ້ນຫຼັກການທີ່ລະບຸໄວ້ໃນເອກະສານການເມືອງລະຫວ່າງສອງຝ່າຍ 4 ສະບັບ, ຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ຍຶດໝັ້ນການປ້ອງກັນໂດຍສະເພາະ ແລະນະໂຍບາຍດັ່ງກ່າວຈະບໍ່ປ່ຽນແປງ.
ສອງຝ່າຍຍັງໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບບັນຫາສາກົນແລະພາກພື້ນທີ່ສົນໃຈຮ່ວມກັນເຊັ່ນສະຖານະການແຫຼມເກົາຫຼີເປັນຕົ້ນ.
 |
