ວັນທີ 16 ເມສານີ້ ຢູ່ທຳນຽບຈົ່ງໜານໄຫ ນະຄອນຫຼວງປັກກິ່ງ, ຄະນະລັດຖະບານຊຸດໃໝ່ຂອງຈີນ ໄດ້ຈັດພິທີສາບານຕົວຕໍ່ລັດຖະທຳມະນູນ ໂດຍການເປັນພິຍານຂອງທ່ານຫຼີເຄີ້ສຽງ ນາຍົກລັດຖະມົນຕີຈີນ.
ອີງຕາມ "ລັດຖະທຳມະນູນສາທາລະນະລັດປະຊາຊົນຈີນ" ສະບັບປັບປຸງ ແລະ "ວິທີຈັດຕັ້ງການສາບານຕົວຕໍ່ລັດຖະທຳມະນູນສຳລັບພະນັກງານລັດທີ່ແຕ່ງຕັ້ງໂດຍລັດຖະບານແລະບັນດາອົງການລັດຖະບານ", ຜູ້ຮັບຜິດຊອບ 92 ທ່ານຂອງ 42 ອົງການແລະໜ່ວຍງານທີ່ແຕ່ງຕັ້ງໂດຍລັດຖະບານແຕ່ເດືອນມິຖຸນາປີ 2017 ຫາເດືອນມີນາປີ 2018 ໄດ້ສາບານຕົວຕໍ່ລັດຖະທຳມະນູນຕາມກົດໝາຍ.
ຫຼັງພິທີສາບານຕົວ, ທ່ານຫຼີເຄີ້ສຽງ ຮຽກຮ້ອງໃຫ້ບັນດາທ່ານຈົ່ງຖືເອົາແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ເປັນແນວຄິດຊີ້ນຳ, ຈົງຮັກພັກດີຕໍ່ລັດຖະທຳມະນູນ, ບໍລິຫານງານຕາມລັດຖະທຳມະນູນ, ປະຕິບັດໜ້າທີ່ຢ່າງຂະຫຍັນຂັນແຂງ ແລະມີຄວາມຮັບຜິດຊອບສູງ, ປອດໃສຂາວສະອາດ, ຍຶດໝັ້ນຖືເອົາການພັດທະນາເປັນໜ້າທີ່ສຳຄັນອັນດັບໜຶ່ງ, ຜັນຂະຫຍາຍທັດສະນະຄະຕິໃໝ່ດ້ານການພັດທະນາ, ຊຸກຍູ້ສັງຄົມໃຫ້ມີຄວາມກ້າວໜ້າຢ່າງຮອບດ້ານ, ເຮັດວຽກເພື່ອສ້າງຜົນປະໂຫຍດໃຫ້ແກ່ປະຊາຊົນ, ແກ້ໄຂບັນຫາຕ່າງໆທີ່ກ່ຽວພັນເຖິງຊີວິດການເປັນຢູ່ຂອງປະຊາຊົນ ແລະພະຍາຍາມສ້າງຜົນງານໃໝ່ທີ່ບໍ່ຜິດຕໍ່ແນວທາງຂອງລັດແລະຄວາມປາຖະໜາຂອງປະຊາຊົນ.
