ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ແລະ ທ່ານກູໂນະ ຕາຣຸ ລັດຖະມົນຕີກະຊວງການຕ່າງປະເທດຍີ່ປຸ່ນ ໄດ້ຮ່ວມກັນເປັນປະທານກອງປະຊຸມສົນທະນາເສດຖະກິດລະດັບສູງຈີນ-ຍີ່ປຸ່ນຄັ້ງທີ 4 ຢູ່ນະຄອນຫຼວງໂຕກຽວ ໃນວັນທີ 16 ເມສານີ້.
ທ່ານຫວາງຢີ້ຊີ້ວ່າ: ປີນີ້ແມ່ນປີຄົບຮອບ 40 ປີແຫ່ງການປະຕິຮູບແລະເປີດປະຕູສູ່ພາຍນອກຂອງຈີນ ການຮ່ວມມືດ້ານເສດຖະກິດການຄ້າລະຫວ່າງຈີນ-ຍີ່ປຸ່ນປະສົບໂອກາດປະຫວັດສາດຄັ້ງໃໝ່ ສອງຝ່າຍຄວນທະນຸຖະໜອມທ່າອ່ຽງການຂະຫຍາຍຕົວທີ່ດີທີ່ໄດ້ມາບໍ່ແມ່ນງ່າຍນີ້, ປົກປ້ອງພື້ນຖານການເມືອງແຫ່ງການພົວພັນລະຫວ່າງສອງປະເທດ, ຍຶດໝັ້ນຕ່າງຝ່າຍຕ່າງມີຜົນປະໂຫຍດ ແລະພັດທະນາຮ່ວມກັນ, ພະຍາຍາມເພື່ອໃຫ້ການຮ່ວມມືດ້ານເສດຖະກິດລະຫວ່າງສອງປະເທດດີຂຶ້ນກວ່າເກົ່າ ແລະ ສຸມໃສ່ການຮ່ວມມືໃນຂົງເຂດປະຢັດພະລັງງານ-ອະນຸລັກສິ່ງແວດລ້ອມ, ການປະດິດສ້າງວິທະຍາສາດ-ເຕັກນິກ, ການເງິນ-ການທະນາຄານ, ການປິ່ນປົວສຸຂະພາບ-ລ້ຽງດູເບິ່ງແຍງຜູ້ເຖົ້າຜູ້ແກ່ ແລະອື່ນໆ ນອກນີ້, ສອງຝ່າຍຄວນຊຸກຍູ້ການຮ່ວມມືໃນຂອບ "ໜຶ່ງແລວໜຶ່ງເສັ້ນທາງ" ໃຫ້ໄດ້ຮັບໝາກຜົນ, ຮ່ວມກັນຊຸກຍູ້ຂະບວນການເຊື່ອມໂຍງເສດຖະກິດອາຊີຕາເວັນອອກ ຮ່ວມກັນຄັດຄ້ານລັດທິປົກປ້ອງການຄ້າ ແລະ ຮ່ວມກັນປົກປ້ອງໂຄງປະກອບການຄ້າຫຼາຍຝ່າຍ.
ທ່ານກູໂນະ ຕາຣຸ ກ່າວວ່າ: ຍີ່ປຸ່ນຍິນດີຮ່ວມກັບຈີນວາງແຜນແລະຂະຫຍາຍການຮ່ວມມືດ້ານເສດຖະກິດການຄ້າລະຫວ່າງສອງປະເທດໃນວິໄສທັດໃໝ່. ໂດຍຜະເຊີນໜ້າກັບລັດທິປົກປ້ອງການຄ້າທີ່ເກີດຂຶ້ນໃໝ່ ຄວນປົກປ້ອງໂຄງປະກອບການຄ້າເສລີທີ່ມີອົງການການຄ້າໂລກເປັນໃຈກາງ ແລະແກ້ໄຂບັນຫາການຄ້າໂດຍອີງຕາມກົດລະບຽບຂອງອົງການການຄ້າໂລກ.
ໃນກອງປະຊຸມສົນທະນາຄັ້ງນີ້, ເຈົ້າໜ້າທີ່ພາກສ່ວນການຕ່າງປະເທດ ແລະເສດຖະກິດການເງິນຂອງສອງປະເທດ ໄດ້ແລກປ່ຽນຄວາມເຫັນຢ່າງເຕັມສ່ວນ ໂດຍປິ່ນອ້ອມນະໂຍບາຍເສດຖະກິດມະຫາພາກ, ການຮ່ວມມືແລະແລກປ່ຽນດ້ານເສດຖະກິດລະຫວ່າງສອງຝ່າຍ, ການຮ່ວມມືຝ່າຍທີ 3 ຈີນ-ຍີ່ປຸ່ນ, ການເຊື່ອມໂຍງເສດຖະກິດອາຊີຕາເວັນອອກກັບການຮ່ວມມືຫຼາຍຝ່າຍ ແລະອື່ນໆ ແລະໄດ້ບັນລຸຄວາມຮັບຮູ້ທີ່ເປັນເອກະພາບກັນໃນຫຼາຍດ້ານ.
