ຕອນເຊົ້າວັນທີ 17 ເມສານີ້ ກໍຄື ໃນໄລຍະຈັດງານມະຫະກຳຮູບເງົາສາກົນປັກກິ່ງຄັ້ງທີ 8, "ຊຸດອົບຮົມການຮ່ວມມືດ້ານການແປແລະພາກສຽງຮູບເງົາ-ໂທລະພາບຈີນ-ຕ່າງປະເທດລະດັບສູງ 2018" ທີ່ຮ່ວມຈັດໂດຍກົມພົວພັນຕ່າງປະເທດ ກະຊວງວັດທະນະທຳແລະທ່ອງທ່ຽວ ແລະ ກົມຮ່ວມມືສາກົນ ອົງການວິທະຍຸ ແລະໂທລະພາບແຫ່ງຊາດຈີນນັ້ນ ໄດ້ຈັດພິທີເປີດຢ່າງເປັນທາງການ ຢູ່ນະຄອນຫຼວງປັກກິ່ງ ໂດຍໄດ້ເຊື້ອເຊີນປະທານງານມະຫະກຳຮູບເງົາ, ຜູ້ຮັບຜິດຊອບອົງການຖ່າຍທຳຮູບເງົາ-ໂທລະພາບ ແລະ ຜູ້ຊ່ຽວຊານດ້ານການແປແລະພາກສຽງຕ່າງປະເທດ 40 ທ່ານຈາກ 24 ປະເທດ ເຊັ່ນ ເນປານ, ປາກິສະຖານ, ສີລັງກາ, ອາເມລິກາ, ການາດາ, ອົສຕຣາລີ, ອີຕາລີ, ໂອຕລິສ ແລະ ຣັດເຊຍ ພ້ອມດ້ວຍຜູ້ຊ່ຽວຊານ, ນັກວິຊາການ ແລະ ຜູ້ມີຄວາມຮູ້ຄວາມສາມາດທາງຮູບເງົາ-ໂທລະພາບຂອງມະຫາວິທະຍາໄລ ແລະສະຖາບັນການສຶກສາຊັ້ນສູງ 30 ກວ່າແຫ່ງຂອງຈີນ ແລະດຶງດູດອົງການຖ່າຍທຳຮູບເງົາ-ໂທລະພາບຈີນ 50 ກວ່າອົງການເຂົ້າຮ່ວມ.
ຊຸດອົບຮົມຄັ້ງນີ້ໄດ້ເນັ້ນ "ການແປຮູບເງົາ-ໂທລະພາບ, ຊົມໃຊ້ວັດທະນະທຳຮ່ວມກັນ" ເພື່ອເພີ່ມທະວີການຮ່ວມມືແລະແລກປ່ຽນວັດທະນະທຳຮູບເງົາ-ໂທລະພາບຈີນ-ຕ່າງປະເທດ, ເພີ່ມຄວາມເຂົ້າໃຈກັນລະຫວ່າງບຸກຄົນໃນວົງການການແປແລະພາກສຽງຮູບເງົາ-ໂທລະພາບຂອງບັນດາປະເທດ ແລະຄູ່ຕຳແໜ່ງຂອງຈີນ, ຊຸກຍູ້ບຸກຄົນພາຍໃນວົງການໃຫ້ເຂົ້າໃຈສະພາບການພັດທະນາສິລະປະຮູບເງົາ-ໂທລະພາບໃນຍຸກປັດຈຸບັນຂອງຈີນຕື່ມອີກ, ແລກປ່ຽນວິທີການແປ-ພາກສຽງ ແລະເຜີຍແຜ່ ເພື່ອຍົກລະດັບການຮ່ວມມືດ້ານການແປ-ພາກສຽງໃຫ້ສູງຂຶ້ນ.
"ຊຸດອົບຮົມການຮ່ວມມືດ້ານການແປແລະພາກສຽງຮູບເງົາ-ໂທລະພາບຈີນ-ຕ່າງປະເທດລະດັບສູງ 2018" ຈະຈັດກິດຈະກຳຕ່າງໆຢູ່ນະຄອນຫຼວງປັກກິ່ງ ແຕ່ວັນທີ 17-21 ເມສານີ້.
