ກະຊວງການຄ້າຈີນຕົກລົງປະຕິບັດມາດຕະການຕ້ານການຂາຍທຸ້ມຕະຫຼາດຕໍ່ເຂົ້າຟ້າງທີ່ນຳເຂົ້າຈາກອາເມລິກາເປັນການຊົ່ວຄາວ

ກະຊວງການຄ້າຈີນອອກຖະແຫຼງການໃນວັນທີ 17 ເມສານີ້, ປະກາດການຕັດສິນເບື້ອງຕົ້ນໃນການສຳຫຼວດຕ້ານການຂາຍທຸ້ມຕະຫຼາດຕໍ່ເຂົ້າຟ້າງທີ່ນຳເຂົ້າຈາກອາເມລິກາ. ກະຊວງການຄ້າຈີນຕັດສິນວ່າ, ເຂົ້າຟ້າງທີ່ນຳເຂົ້າຈາກອາເມລິກາມີການກະທຳແບບຂາຍທຸ້ມຕະຫຼາດ, ຂະແໜງການຜະລິດເຂົ້າຟ້າງຂອງຈີນໄດ້ຮັບຄວາມເສຍຫາຍຢ່າງແທ້ຈິງ, ຄວາມເສຍຫາຍ ແມ່ນເກີດຂຶ້ນຍ້ອນການຂາຍທຸ້ມຕະຫຼາດດັ່ງກ່າວ, ສະນັ້ນຈຶ່ງຕົກລົງປະຕິບັດມາດຕະການຕ້ານຂາຍທຸ້ມຕະຫຼາດຕໍ່ເຂົ້າຟ້າງທີ່ນຳເຂົ້າຈາກອາເມລິກາເປັນການຊົ່ວຄາວ.

ຕາມການຕັດສິນ, ເລີ່ມແຕ່ວັນທີ 18 ເມສານີ້ເປັນຕົ້ນໄປ, ນັກທຸລະກິດຕ້ອງຈ່າຍຄ່າຮັບປະກັນໃຫ້ແກ່ດ່ານພາສີຂອງ ສປ ຈີນໂດຍອີງຕາມອັດຕາຄ່າຮັບປະກັນທີ່ການຕັດສິນກຳນົດໄວ້ຄື 178,6% ໃນເວລານຳເຂົ້າເຂົ້າຟ້າງຈາກອາເມລິກາ.

ພາຍຫຼັງການຕັດສິນເບື້ອງຕົ້ນນີ້ແລ້ວ, ກະຊວງການຄ້າຈີນຈະສືບຕໍ່ສຳຫຼວດຕໍ່ຄະດີນີ້ແລະໃຫ້ການຕັດສິນສຸດທ້າຍ. ກະຊວງການຄ້າຈີນຈະອີງຕາມກົດໝາຍທີ່ກ່ຽວຂ້ອງຂອງຈີນ, ແລະຂໍ້ກຳນົດຂອງອົງການການຄ້າໂລກຮັບປະກັນສິດທີ່ຊອບດ້ວຍກົດໝາຍຂອງຝ່າຍຕ່າງໆທີ່ກ່ຽວຂ້ອງ.