ມູນນິທິສັນຕິພາບຊາຊາກາວະ ຍີ່ປຸ່ນ ໄດ້ຈັດງານລ້ຽງຢູ່ນະຄອນຫຼວງໂຕກຽວໃນວັນທີ 17 ເມສານີ້ ເພື່ອຕ້ອນຮັບຄະນະຜູ້ແທນນາຍທະຫານຊັ້ນນາຍພັນ ກອງທັບປົດປ່ອຍປະຊາຊົນຈີນຢ້ຽມຢາມຍີ່ປຸ່ນຢ່າງອົບອຸ່ນ.
ການຢ້ຽມຢາມເທື່ອນີ້ແມ່ນສ່ວນໜຶ່ງຂອງໂຄງການແລກປ່ຽນກິດຈະການນປ້ອງກັນປະເທດລະຫວ່າງສອງປະເທດທີ່ຮ່ວມດຳເນີນໂດຍມູນນິທິສັນຕິພາບຊາຊາກາວະ, ມູນນິທິມິດຕະພາບຈີນ-ຍີ່ປຸ່ນ ແລະ ສະມາຄົມຍຸດທະສາດສາກົນຈີນ ແລະນັບແຕ່ເລີ່ມດຳເນີນໂຄງການດັ່ງກ່າວເມື່ອປີ 2001 ເປັນຕົ້ນມາໄດ້ມີນາຍທະຫານກອງປ້ອງກັນຕົວຍີ່ປຸ່ນເກືອບ 130 ທ່ານມາຢ້ຽມຢາມຈີນ ແລະ ນາຍທະຫານກອງທັບປົດປ່ອຍປະຊາຊົນຈີນກວ່າ 200 ທ່ານໄປຢ້ຽມຢາມຍີ່ປຸ່ນ. ແຕ່ການເຄື່ອນໄຫວດັ່ງກ່າວໄດ້ຢຸດຕິຊົ່ວຄາວຫຼັງເດືອນກຸມພາປີ 2012.
ທ່ານສືໂກ໋ວວຸ້ຍ ຮອງຫົວໜ້າຫ້ອງການການຮ່ວມມືການທະຫານສາກົນ ຄະນະກຳມະການການທະຫານສູນກາງຈີນ ຫົວໜ້າຄະນະນາຍທະຫານຈີນ ກ່າວວ່າ: ກົນໄກຢ້ຽມຢາມເຊິ່ງກັນແລະກັນນີ້ ແມ່ນເວທີສຳຄັນສຳລັບການແລກປ່ຽນກັນລະຫວ່າງນາຍທະຫານໜຸ່ມຈີນ-ຍີ່ປຸ່ນ ໄດ້ເສີມຂະຫຍາຍບົດບາດທີ່ສຳຄັນຕໍ່ການຮັກສາຄວາມຕໍ່ເນື່ອງຂອງການພົວພັນທາງກິດຈະການປ້ອງກັນຈີນ-ຍີ່ປຸ່ນ ແລະສະສົມພະລັງຢ່າງສ້າງສັນຕໍ່ການພັດທະນາການພົວພັນລະຫວ່າງສອງປະເທດ.
ໃນການຢ້ຽມຢາມເປັນເວລາ 8 ວັນເທື່ອນີ້, ຄະນະຜູ້ແທນຍັງຈະທັດສະນະສຶກສາຫ້ອງປະຊຸມລັດຖະສະພາຍີ່ປຸ່ນ ແລະ ຖານທັບກອງປ້ອງກັນຕົວ ທັງຈະແລກປ່ຽນກັບນາຍທະຫານກອງປ້ອງກັນຕົວ, ບຸກຄົນໃນວົງການວິສາຫະກິດທ້ອງຖິ່ນ ແລະ ອົງການຈັດຕັ້ງທາງສັງຄົມຍີ່ປຸ່ນອີກດ້ວຍ.
