ໜັງສືພິມ "ໜານຢາງຊ່າງປ້າວ" ຂອງສິງກະໂປສະບັບວັນທີ 17 ເມສານີ້ລາຍງານວ່າ: ຈີນເປັນຄູ່ຄ້າໃຫຍ່ອັນດັບໜຶ່ງຂອງອາຊຽນມາເປັນເວລາ 8 ປີຢ່າງຕໍ່ເນື່ອງ, ຂະນະທີ່ຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ກໍພວມສົ່ງເສີມວິສາຫະກິດຈີນພັດທະນາທຸລະກິດຢູ່ຕ່າງປະເທດ ເພື່ອຫັນທຸລະກິດເປັນແບບສາກົນ ແລະ ທະນາຄານຢູໄນເຕັດ ໂອເວີຊິສ ສິງກະໂປ ກໍຄາດວ່າ ປີນີ້ຈະມີວິສາຫະກິດຈີນໄປພັດທະນາທຸລະກິດຢູ່ອາຊຽນຫຼາຍຍິ່ງຂຶ້ນ.
ທະນາຄານຢູໄນເຕັດ ໂອເວີຊິສ ສິງກະໂປ ແຈ້ງວ່າ: ປີຜ່ານມາ, ທຶນຈີນຜ່ານບໍລິສັດຕົນເຂົ້າສູ່ອາຊຽນມີເກືອບ 20 ຕື້ໂດລາສິງກະໂປ ຄາດວ່າປີນີ້ ຈຳນວນລູກຄ້າທີ່ເປັນວິສາຫະກິດຈີນຂອງບໍລິສັດຕົນຈະເພີ່ມຂຶ້ນອີກ 50%. ທ່ານຈ່າງຈື້ຈ່ຽນ ຫົວໜ້າພະແນກທີ່ປຶກສາການລົງທຶນຕ່າງປະເທດໂດຍກົງຂອງທະນາຄານດັ່ງກ່າວ ໄດ້ເຂົ້າຮ່ວມເວທີປຶກສາຫາລືການຄ້າ-ການລົງທຶນ "ໜຶ່ງແລວໜຶ່ງເສັ້ນທາງ" ທີ່ຈັດຂຶ້ນຢູ່ນະຄອນຫຼວງປັກກິ່ງ ໂດຍຊີ້ໃຫ້ເຫັນວ່າ: ບັນດາປະເທດໃນອາຊຽນລ້ວນແຕ່ກຳລັງເລັ່ງພັດທະນາອຸດສາຫະກຳແລະພື້ນຖານໂຄງລ່າງຂອງປະເທດຕົນ ສະນັ້ນ, ຈຶ່ງມີຄວາມຕ້ອງການຕໍ່ການລົງທຶນ ແລະການໂອນເຕັກນິກທີ່ກ່ຽວຂ້ອງຈາກຕ່າງປະເທດນັບມື້ເພີ່ມຂຶ້ນ.
ທະນາຄານຢູໄນເຕັດ ໂອເວີຊິສ ຍັງກ່າວວ່າ: ພະແນກທີ່ປຶກສາການລົງທຶນຕ່າງປະເທດໂດຍກົງຂອງທະນາຄານຕົນ ໄດ້ຕັ້ງໃຫ້ມີໂຕະຈີນໂດຍສະເພາະຢູ່ປະເທດາຊີຕາເວັນອອກສຽງໃຕ້ ລວມທັງອິນໂດເນເຊຍ, ມາເລເຊຍ, ສິງກະໂປ, ໄທ ແລະ ຫວຽດນາມ, ຂະນະທີ່ພະແນກທີ່ປຶກສາການລົງທຶນຕ່າງປະເທດໂດຍກົງ ຍັງຈະສືບຕໍ່ເປັນຊ່ອງທາງຕົ້ນຕໍໃນການຊ່ວຍທຶນຈີນໄຫຼເຂົ້າສູ່ອາຊຽນ.
