ທ່ານນາງ ຮວ້າຊຸ່ນຢິງ ໂຄສົກກະຊວງການຕ່າງປະເທດຈີນ ໄດ້ຕອບຄຳຖາມກ່ຽວກັບບັນຫາຄວາມຂັດແຍ້ງກັນດ້ານການຄ້າກັບອາເມລິກາໃນວັນທີ 17 ເມສານີ້ວ່າ, ຖ້າຫາກອາເມລິກາປະຕິບັດຕາມລຳພັງໃຈ, ສືບຕໍ່ຝືນກັບກະແສຍຸກສະໄໝ, ຈີນຍ່ອມຈະກຽມພ້ອມຕອບໂຕ້ຄືນຢ່າງແນ່ນອນ ເພື່ອເອົາຊະນະສົງຄາມປ້ອງກັນລັດທິຫຼາຍຝ່າຍແລະການຄ້າເສລີບັ້ນນີ້.
ທ່ານນາງ ຮວ້າຊຸ່ນຢິງ ກ່າວໃນກອງປະຊຸມຖະແຫຼງຂ່າວໃນມື້ດຽວກັນວ່າ, ກໍຄືທ່ານປະທານ ສີຈິ້ນຜິງ ໄດ້ຊີ້ໃຫ້ເຫັນໃນໂອກາດພົບປະກັບທ່ານ ຄລາວສ໌ ສະວັບ ປະທານເວທີປຶກສາຫາລືເສດຖະກິດໂລກໃນວັນທີ 16 ເມສານີ້, ການປິດປະຕູຈະເຂົ້າສູ່ທາງຈົນຕາແຈໃນທີ່ສຸດ, ມີແຕ່ການເປີດປະຕູແລະການຮ່ວມມືເທົ່ານັ້ນ ຈຶ່ງສາມາດເຮັດໃຫ້ເສັ້ນທາງນັບມື້ນັບກວ້າງຂວາງ. ປະເທດໃຫຍ່ມີໜ້າທີ່ຮັບຜິດຊອບທີ່ສຳຄັນແລະພິເສດໃນດ້ານນີ້. ໃນຖານະເປັນປະເທດໃຫຍ່ທີ່ມີຄວາມຮັບຜິດຊອບ, ຈີນຍິນດີຮ່ວມກັບປະຊາຄົມໂລກ, ດຳເນີນການຮ່ວມມືໃນທ່າມກາງການເປີດປະຕູ, ສະແຫວງຫາການໄດ້ຮັບຜົນປະໂຫຍດຮ່ວມກັນດ້ວຍການຮ່ວມມື, ເສີມຂະຫຍາຍບົດບາດອັນຕັ້ງໜ້າແລະປະກອບສ່ວນລັກສະນະສ້າງສັນເພື່ອສ້າງອະນາຄົດທີ່ແຈ້ງສະຫວ່າງ, ໝັ້ນທ່ຽງ ແລະຈົບງາມຂອງໂລກໃຫ້ຫຼາຍກວ່າເກົ່າ.
ໃນໄລຍະຈັດການສົນທະນາລະດັບສູງດ້ານເສດຖະກິດຈີນ-ຍີ່ປຸ່ນຄັ້ງທີ 4 ແລະການສົນທະນາຍຸດທະສາດແລະເສດຖະກິດຈີນ-ອິນເດຍຄັ້ງທີ 5, ຍີ່ປຸ່ນແລະອິນເດຍລ້ວນແຕ່ກ່າວວ່າສະໜັບສະໜູນໂຄງປະກອບການຄ້າຫຼາຍຝ່າຍທີ່ມີກະຕິກາ ແລະ ຄວນປົກປັກຮັກສາໂຄງປະກອບການຄ້າເສລີທົ່ວໂລກທີ່ຖືອົງການການຄ້າໂລກເປັນໃຈກາງ. ນອກນີ້, ຜູ້ນຳຕ່າງປະເທດແລະອົງການຈັດຕັ້ງສາກົນຫຼາຍທ່ານ ກໍໄດ້ສະແດງທັດສະນະທີ່ຄ້າຍຄືກັນ.
ທ່ານນາງ ຮວ້າຊຸ່ນຢິງ ກ່າວຕື່ມວ່າ, ຫຼາຍມື້ມານີ້, ປະຊາຄົມໂລກພາກັນຮຽກຮ້ອງໃຫ້ອາເມລິກາເຄົາລົບອົງການການຄ້າໂລກ ແລະປະຕິບັດຕາມກະຕິກາຫຼາຍຝ່າຍ. ຂະນະດຽວກັນ ຢູ່ພາຍໃນປະເທດອາເມລິກາ ກໍມີຄົນນັບມື້ນັບຫຼາຍ ເຊິ່ງລວມທັງສະມາຄົມການຄ້າ 107 ແຫ່ງຮ່ວມກັນລົງນາມເພື່ອຄັດຄ້ານການກະທຳທີ່ທຳລາຍຜູ້ອື່ນແລະຕົນເອງຂອງອາເມລິກາ.
 |
