ອົງການການຄ້າໂລກ ຫຼື WTO ໄດ້ເປີດເຜີຍເອກະສານສະບັບໜຶ່ງຫວ່າງມໍ່ໆມານີ້ ໂດຍສະແດງໃຫ້ເຫັນວ່າ ອາເມລິກາໄດ້ແຈ້ງຕໍ່ WTO ຫວ່າງມໍ່ໆມານີ້ວ່າ: ຍິນດີຫາລືກັບຈີນໃນກົນໄກແກ້ໄຂຄວາມຂັດແຍ້ງຂອງອົງການການຄ້າໂລກກ່ຽວກັບມາດຕະການ 232 ຕໍ່ຜະລິດຕະພັນເຫຼັກກ້າ-ອາລູມີນຽມ ແລະ ການເກັບພາສີໃນໂຄງການກວດກາ 301 ຕໍ່ຈີນຂອງອາເມລິກາ. ການກະທຳດັ່ງກ່າວຂອງອາເມລິການັບວ່າເປັນການເຄົາລົບລະບຽບປົກກະຕິຂອງການແກ້ໄຂຄວາມຂັດແຍ້ງທາງການຄ້າຂອງອົງການການຄ້າໂລກ.
ເອກະສານທີ່ WTO ເປີດເຜີຍນັ້ນສະແດງໃຫ້ເຫັນວ່າ ເຖິງວ່າອາເມລິກາຊີ້ວ່າຍັງສະຫງວນຄວາມເຫັນຕໍ່ການຮ້ອງຂໍປຶກສາຫາລືຂອງຈີນກໍຕາມ ແຕ່ກໍຍິນດີຫາລືກັບຈີນເພື່ອແກ້ໄຂຄວາມຂັດແຍ້ງລະຫວ່າງສອງຝ່າຍ. ສ່ວນການໃຊ້ມາດຕະການ 232 ຕໍ່ຜະລິດຕະພັນເຫຼັກກ້າ-ອາລູມີນຽມນັ້ນ, ອາເມລິກາຊີ້ວ່າ: ນະໂຍບາຍເກັບພາສີລາຍການນີ້ບໍ່ແມ່ນມາດຕະການປົກປ້ອງການຄ້າ ແຕ່ແມ່ນມາດຕະການທີ່ປະຕິບັດເພື່ອຮັບມືຕໍ່ການນຳເຂົ້າຜະລິດຕະພັນດັ່ງກ່າວແລະກະທົບເຖິງຄວາມໝັ້ນຄົງຂອງອາເມລິກາທັງນັ້ນ ແຕ່ກົນໄກແກ້ໄຂຄວາມຂັດແຍ້ງຂອງອົງການການຄ້າໂລກບໍ່ສາມາດແກ້ໄຂບັນຫາພາສີທີ່ກ່ຽວພັນເຖິງ "ຄວາມໝັ້ນຄົງແຫ່ງຊາດ".
ສ່ວນການວາງຂໍ້ສະເໜີໃຫ້ຂຶ້ນພາສີຕື່ມຕໍ່ຜະລິດຕະພັນນຳເຂົ້າຈາກຈີນໃນໂຄງການກວດກາ 301 ນັ້ນ, ອາເມລິກາກ່າວວ່າຍິນດີປຶກສາຫາລືກັນຕໍ່ກັບບັນຫາດັ່ງກ່າວ ແຕ່ປັດຈຸບັນ ການຂຶ້ນພາສີຕື່ມຍັງເປັນພຽງຂໍ້ສະເໜີເທົ່ານັ້ນ ຍັງບໍ່ທັນປະຕິບັດຢ່າງເປັນທາງການເທື່ອ ສະນັ້ນ, ບັນຫາທີ່ຈີນຍົກຂຶ້ນມານັ້ນ ຈຶ່ງບໍ່ມີຈຸດໃດ ທີ່ເປັນບັນຫາຕົວຈິງໃຫ້ແກ້ໄຂໃນກົນໄກແກ້ໄຂຄວາມຂັດແຍ້ງດັ່ງກ່າວ.
