ງານມະຫະກຳຮູບເງົາສາກົນປັກກິ່ງ ໄດ້ຈັດກອງປະຊຸມສົນທະນາ ຢູ່ນະຄອນຫຼວງປັກກິ່ງໃນວັນທີ 18 ເມສານີ້ ໂດຍຜູ້ຮັບຜິດຊອບຫໍສຳເນົາຮູບເງົາຈີນ ແລະ ບໍລິສັດຮູບເງົາ-ໂທລະພາບຈີນຈຳນວນໜຶ່ງເຂົ້າຮ່ວມ ເພື່ອຫາລືຫົວຂໍ້ຕ່າງໆ ເຊັ່ນ ການພົວພັນລະຫວ່າງຖານຂໍ້ມູນໃຫຍ່ກັບຮູບເງົາ, ວິທີທາງໃນການສ້າງຮູບເງົາໃຫ້ຖືກກັບຄວາມຕ້ອງການຂອງຜູ້ຊົມໂດຍຜ່ານການວິໄຈຕົວເລກຂໍ້ມູນ, ການດຶງດູດຈິດໃຈຜູ້ຊົມດ້ວຍເລື່ອງລາວທີ່ຊັກນຳໃຫ້ເກີດຄວາມຈັບອົກຈັບໃຈ ແລະອື່ນໆ.
ທ່ານກ່າວເຫວິນທ່າວ ຄູ່ຮ່ວມບໍລິສັດຢີ້ເອິ່ນ, ຜູ້ອຳນວຍການໃຫຍ່ສູນວາງແຜນ ກ່າວວ່າ: ປີ 2016 ເປັນຈຸດລ້ຽວຂອງຕະຫຼາດຮູບເງົາ ເຊິ່ງອຸດສາຫະກຳຮູບເງົາໄດ້ຈາກໄລຍະເຕີບໂຕແບບວ່ອງໄວເຂົ້າສູ່ໄລຍະເຕີບໂຕແບບປົກກະຕິສະໝ່ຳສະເໝີ ແລະໃນເງື່ອນໄຂທາງຍຸກສະໄໝແຫ່ງການບໍລິໂພກຍົກລະດັບສູງຂຶ້ນ ແລະນະໂຍບາຍກໍເອື້ອອຳນວຍ, ຄາດວ່າເມື່ອຮອດປີ 2020, ລາຍຮັບຈາກປີ້ເຂົ້າຊົມຮູບເງົາຂອງຈີນຈະບັນລຸກາຍ 80 ຕື້ຢວນ. ໃນຕໍ່ໜ້າ, ການແບ່ງງານໃນຕ່ອງໂສ້ອຸດສາຫະກຳຈະນັບມື້ລະອຽດຍິ່ງຂຶ້ນ ໂອກາດປະດິດສ້າງກໍຈະຫຼວງຫຼາຍຂຶ້ນ ລວມເຖິງການຮ່ວມມືດ້ານຮູບເງົາລະຫວ່າງຈີນກັບປະເທດລຽບຕາມ "ໜຶ່ງແລວໜຶ່ງເສັ້ນທາງ" ກໍຈະເພີ່ມທະວີຍິ່ງຂຶ້ນໄປອີກ.
