ວັນທີ 18 ເມສານີ້, ທ່ານລຸຍຈ້ຽນ ເອກອັກຄະລັດຖະທູດຈີນປະຈຳໄທ ແລະ ທ່ານນາງນັນທະວັນ ສະກຸນຕະນາກ ຮອງລັດຖະມົນຕີກະຊວງພານິດໄທໄດ້ລົງນາມໃນສັນຍາຮ່ວມມືໂຄງການງວດທຳອິດຂອງຝ່າຍໄທໃນຂອບກອງທຶນສະເພາະການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຢູ່ກະຊວງພານິດໄທ.
ທ່ານລຸຍຈ້ຽນກ່າວວ່າ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ສ່ອງແສງເຖິງຄວາມປາຖະໜາຂອງຈີນ ແລະ ປະເທດອ້ອມຂ້າງໃນການຮ່ວມກັນຊຸກຍູ້ການເຊື່ອມຈອດກັນ ແລະ ເລັ່ງລັດການພັດທະນາແບບເຊື່ອມໂຍງ. ຈີນໄດ້ອອກແຮງຊຸກຍູ້ສ້າງສາເສດຖະກິດໂລກແບບເປີດປະຕູມາໂດຍຕະຫຼອດ. ທ່ານປະທານສີຈິ້ນຜິງໄດ້ກ່າວຄຳປາໄສສຳຄັນໃນກອງປະຊຸມປະຈຳປີຂອງເວທີປຶກສາຫາລືອາຊີໂປອາວທີ່ຫາກໍສິ້ນສຸດລົງໃນມໍ່ໆມານີ້ ໂດຍກ່າວເນັ້ນວ່າ, ຈີນຈະບໍ່ປິດປະຕູ, ມີແຕ່ເປີດປະຕູສູ່ພາຍນອກນັບມື້ນັບກວ້າງຂວາງ. ການເປີດປະຕູສູ່ພາຍນອກຂອງຈີນຍ່ອມຈະສ້າງຜົນປະໂຫຍດໃຫ້ແກ່ປະເທດອ້ອມຂ້າງ ເຊິ່ງລວມທັງປະເທດລຸ່ມແມ່ນ້ຳຂອງໄວກວ່າໝູ່ ແລະ ຫຼາຍກວ່າໝູ່. ຈີນຍິນດີສືບຕໍ່ຮັກສາການແລກປ່ຽນ ແລະ ຮ່ວມມືຢ່າງໃກ້ຊິດກັບປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງ ເຊິ່ງລວມທັງໄທ ເພື່ອສ້າງຄວາມຜາສຸກໃຫ້ແກ່ປະຊາຊົນໃນພາກພື້ນນີ້.
ອີງຕາມສັນຍາສະບັບນີ້, ຈີນຈະລົງທຶນຊ່ວຍໄທພັດທະນາ 4 ໂຄງການ ຄື: ການພັດທະນາເຂດເສດຖະກິດພິເສດຂ້າມຊາຍແດນ, ການຍົກລະດັບພື້ນຖານໂຄງລ່າງການຄ້າແລະການຈໍລະຈອນສິນຄ້າຊາຍແດນ, ເວທີປຶກສາຫາລືທຸລະກິດແມ່ນ້ຳລ້ານຊ້າງ-ແມ່ນ້ຳຂອງ ແລະ ການພັດທະນາທຸລະກິດເອັກເລັກໂຕຼນິກຊົນນະບົດອະນຸພາກພື້ນ.
 |
