ບໍລິສັດແອບັສແລະກະຊວງປ້ອງກັນປະເທດມາເລເຊຍເຊັນສັນຍາແກ່ຍາວເວລາບໍລິການ

    ວັນທີ 18 ເມສານີ້, ບໍລິສັດແອບັສປະກາດວ່າ, ໄດ້ເຊັນສັນຍາສະບັບໜຶ່ງກັບກະຊວງປ້ອງກັນປະເທດມາເລເຊຍ ໂດຍຈະສືບຕໍ່ໃຫ້ການບໍລິການຊ່ວຍເຫຼືອຍົນຂົນສົ່ງທາງການທະຫານ A400M ຂອງກອງທັບອາກາດມາເລເຊຍ.

    ສັນຍາສະບັບນີ້ ໄດ້ເຊັນກັນໃນໄລຍະງານວາງສະແດງສິນຄ້າປ້ອງກັນປະເທດອາຊີມາເລເຊຍ 2018 ເພື່ອແກ່ຍາວເວລາບໍລິການລະຫວ່າງບໍລິສັດແອບັສກັບກະຊວງປ້ອງກັນປະເທດມາເລເຊຍ.

    ອີງຕາມສັນຍາສະບັບນີ້, ບົນພື້ນຖານການຮ່ວມມືກັບວິສາຫະກິດທີ່ສະໜອງເຄື່ອງອະໄຫຼ່ຂອງທ້ອງຖິ່ນ, ບໍລິສັດແອບັສຈະສືບຕໍ່ສະໜອງວັດສະດຸພ້ອມດ້ວຍການບໍລິການດ້ານໂຄງການ, ການບິນ ແລະການບຳລຸງຮັກສາໃຫ້ແກ່ຍົນຂົນສົ່ງທາງການທະຫານ A400M ຂອງກອງທັບອາກາດມາເລເຊຍ. ບໍລິສັດແອບັສໄດ້ອອກຖະແຫຼງການວ່າ, ມີແຜນການມອບວຽກງານເຫຼົ່ານີ້ໃຫ້ແກ່ທະຫານອາກາດມາເລເຊຍແລະນັກວິຊາການເຕັກນິກທ້ອງຖິ່ນໄປເທື່ອລະກ້າວ.