ເມື່ອບໍ່ດົນມານີ້, ນັກທ່ອງທ່ຽວຊາວນອກແວຜູ້ໜຶ່ງໄດ້ຮັບບາດເຈັບຍ້ອນຖືກປາສະຫຼາມກັດ ຂະນະທີ່ລົງຫຼິ້ນນ້ຳຢູ່ເຂດທະເລແຫ່ງໜຶ່ງ ທີ່ເມືອງຫົວຫີນ ເຊິ່ງເປັນແຫຼ່ງທ່ອງທ່ຽວແຄມທະເລຂອງໄທ. ເພື່ອປ້ອງກັນບໍ່ໃຫ້ເກີດເຫດການຄ້າຍຄືກັນອີກ ເຈົ້າໜ້າທີ່ແຂວງປະຈວບຄີຣີຂັນ ທີ່ເມືອງຫົວຫີນສັງກັດຢູ່ນັ້ນ ໄດ້ອອກຄຳສັ່ງໃນວັນທີ 18 ເມສານີ້ ໃຫ້ວາງຕາໜ່າງກັນປາສະຫຼາມຢູ່ເຂດທະເລທີ່ກ່ຽວຂ້ອງ ແລະຕັ້ງປ້າຍເຕືອນໄພທີ່ຂຽນໂດຍພາສາໄທ, ພາສາຈີນ ແລະ ພາສາອັງກິດ.
ເຈົ້າແຂວງປະຈວບຄີຣີຂັນ ກ່າວວ່າ: ຫຼັງນັກວິຊາການໄດ້ກວດຮອຍບາດແຜຢູ່ຂາຂອງນັກທ່ອງທ່ຽວຊາວນອກແວອາຍຸ 54 ປີທີ່ຖືກເຄາະຮ້າຍ ພົບວ່າເປັນຮອຍແຂ້ວຂອງປາສະຫຼາມແທ້ ແລະຈາກຮອຍກັດສາມາດວິນິໄສໄດ້ວ່າ ປາສະຫຼາມໂຕນີ້ມີອາຍຸບໍ່ທັນຮອດ 1 ປີ ລຳຕົວຍາວປະມານ 1 ແມັດ ມັນອາດເຫັນວ່ານັກທ່ອງທ່ຽວເປັນປາ ຫຼືສັດຕູ ຈຶ່ງໄດ້ທຳການໂຈມຕີ. ຫຼັງຖືກກັດ, ຜູ້ຖືກບາດເຈັບຕ້ອງຫຍິບບາດແຜ 19 ເຂັມ ແລະປັດຈຸບັນ ພວມຢູ່ໃນໄລຍະຮັກສາບາດແຜ. ນັກວິຊາການດ້ານທະເລຂອງໄທ ກ່າວວ່າ: ທຳມະດາແລ້ວ, ປາສະຫຼາມສາຍພັນນີ້ຈະບໍ່ຄ່ອຍໂຈມຕີ ຫຼື ກັດຄົນ ເວັ້ນເສຍແຕ່ມັນຖືກຄຸກຄາມກ່ອນ.
