ບໍລິສັດໂທລະຄົມ ZTE ຂອງຈີນໄດ້ອອກຖະແຫຼງການໃນວັນທີ 20 ເມສານີ້ວ່າ, ໂດຍແນໃສ່ກະຊວງການຄ້າອາເມລິກາທີ່ໄດ້ຜ່ານການຕົກລົງທຳການປະຕິເສດຕໍ່ບໍລິສັດໂທລະຄົມ ZTE ແລະ ບໍລິສັດຄາງຊຸນ ZTE, ບໍລິສັດ ZTE ເຫັນວ່າການກະທຳເຊັ່ນນີ້ໄຮ້ຄວາມເປັນທຳທີ່ສຸດ ແລະ ບໍ່ສາມາດຮັບເອົາໄດ້.
ກະຊວງການຄ້າອາເມລິກາອອກຖະແຫຼງການໃນວັນທີ 16 ເມສານີ້ວ່າ, ຍ້ອນວ່າ ບໍລິສັດ ZTE ໄດ້ລະເມີດສັນຍາຄວາມປອງດອງກັບລັດຖະບານອາເມລິກາ, ຝ່າຍຕົນຈະປະຕິບັດຄຳສັ່ງຫ້າມສົ່ງອອກເປັນເວລາ 7 ປີຕໍ່ບໍລິສັດດັ່ງກ່າວ ເຊິ່ງໝາຍຄວາມວ່າ ວິສາຫະກິດອາເມລິກາຈະບໍ່ສາມາດສະໜອງຜະລິດຕະພັນຕ່າງໆ ເຊິ່ງລວມທັງເຄື່ອງອະໄຫຼ່ໃຫ້ບໍລິສັດ ZTE ພາຍໃນເວລາ 7 ປີ.
ຖະແຫຼງການຂອງບໍລິສັດ ZTE ຂຽນວ່າ, ຄຳສັ່ງດັ່ງກ່າວບໍ່ພຽງແຕ່ຈະສົ່ງຜົນກະທົບຢ່າງໜັກໜ່ວງຕໍ່ບໍລິສັດຕົນເທົ່ານັ້ນ, ຫາກຍັງທຳລາຍຜົນປະໂຫຍດຂອງຄູ່ຮ່ວມມືຂອງບໍລິສັດ ZTE ທັງໝົດຂອງອາເມລິກາ. ຖະແຫຼງການຂຽນຕື່ມວ່າ, ບໍລິສັດຕົນຈະບໍ່ປະລະຄວາມພະຍາຍາມແກ້ໄຂບັນຫາດ້ວຍວິທີແລກປ່ຽນແລະສົນທະນາກັນ, ລວມໄປເຖິງໃຊ້ການຕັດສິນໃຈຂັ້ນເດັດຂາດທຸກຮູບແບບທີ່ກົດໝາຍອະນຸຍາດ ເພື່ອປົກປ້ອງຜົນປະໂຫຍດຊອບກົດໝາຍຂອງຕົນ.
 |
