ໜັງສືພິມນານຢາງຊ່າງປ້າວສະບັບວັນທີ 19 ເມສານີ້ ລາຍງານວ່າ, ຈີນຈະພັດທະນາວຽກງານການຫຼິ້ນພະນັນ ແລະແຂ່ງມ້າເປັນຕົ້ນຢູ່ແຂວງໄຫຫຼຳ ແລະຫວັງຢາກຈະສ້າງແຂວງດັ່ງກ່າວໃຫ້ເປັນເຂດທ່ອງທ່ຽວ ແລະກາຍເປັນດັດຊະນີໃໝ່ຂອງການເປີດປະຕູເສດຖະກິດ. ຂ່າວຫຼ້າສຸດລາຍງານວ່າ, ໄຫຫຼຳຈະອະນຸຍາດໃຫ້ປະຊາຊົນ 59 ປະເທດເຊິ່ງລວມທັງມາເລເຊຍຜ່ານແດນໂດຍບໍ່ຕ້ອງວີຊາຫາກຢູ່ໃນໄຫຫຼຳບໍ່ເກີນ 30 ມື້.
ໃນມື້ທີ 5 ຫຼັງຈາກທ່ານ ສີຈິ້ນຜິງ ປະທານປະເທດຈີນປະກາດການສ້າງເຂດການຄ້າເສລີ ແລະທ່າການຄ້າເສລີໃນທົ່ວແຂວງໄຫຫຼຳ, ອົງການຄຸ້ມຄອງຄົນຕ່າງປະເທດແຫ່ງຊາດຈີນແຈ້ງໃຫ້ຊາບວ່າ, ຜ່ານຈາກການອະນຸມັດຂອງລັດຖະບານ, ນັບແຕ່ວັນທີ 1 ພຶດສະພາປີນີ້ເປັນຕົ້ນໄປ ຈະປະຕິບັດນະໂຍບາຍຍົກເວັ້ນວີຊາໃນການເຂົ້າສູ່ໄຫຫຼຳຕໍ່ປະຊາຊົນ 59 ປະເທດ ທັງຜ່ອນຜັນມາດຕະການຍົກເວັ້ນວີຊາໃຫ້ສະເພາະກຸ່ມຄະນະມາເປັນການຍົກເວັ້ນວີຊາຕໍ່ສ່ວນບຸກຄົນ ແລະແກ່ຍາວເວລາຢູ່ເກາະໄຫຫຼຳໃຫ້ເປັນ 30 ມື້ຢ່າງເປັນເອກະພາບກັນ. ມາດຕະການດັ່ງກ່າວ ຈະສະໜັບສະໜູນໄຫຫຼຳໃນການລົງເລິກການປະຕິຮູບແລະໄຂປະຕູສູ່ພາຍນອກຢ່າງຮອບດ້ານຕື່ມອີກ, ຈະມີຜົນດີຕໍ່ການພັດທະນາວຽກງານທ່ອງທ່ຽວຂອງໄຫຫຼຳ ແລະຍົກສູງຊື່ສຽງຂອງຂະແໜງການທ່ອງທ່ຽວຂອງໄຫຫຼຳສູ່ໂລກ.
 |
