ໜັງສືພິມຊ່າງປ້າວຟິລິບປິນສະບັບວັນທີ 18 ເມສານີ້ລາຍງານວ່າ, ຫວ່າງກ່ອນນີ້ບໍ່ດົນ, ບໍລິສັດຫຼັກຊັບໂນມູຣາຍີ່ປຸ່ນໄດ້ເປີດເຜີຍບົດລາຍງານຄົ້ນຄວ້າ ໂດຍສະແດງໃຫ້ເຫັນວ່າ, ຟິລິບປິນຈະເປັນໜຶ່ງໃນ 4 ກຸ່ມເສດຖະກິດອາຊີທີ່ໄດ້ຮັບຜົນປະໂຫຍດຫຼາຍທີ່ສຸດຈາກການສ້າງ "ໜຶ່ງແລວໜຶ່ງເສັ້ນທາງ" ຂອງຈີນ. ໃນນັ້ນ, ການຊ່ວຍເຫຼືອຂອງຈີນໃນດ້ານພື້ນຖານໂຄງລ່າງໃຫ້ຟິລິບປິນນັ້ນ ອາດຈະບັນລຸເຖິງ 10,5% ຂອງ GDP ຟິລິບປິນ, ເຊິ່ງເປັນທີ 4 ໂດຍຖັດຈາກປາກີສະຖານ, ບັງກາລາເດັດ ແລະມາເລເຊຍ.
ບົດລາຍງານຊີ້ໃຫ້ເຫັນວ່າ, ຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ແມ່ນ "ເວທີສຳລັບປະເທດລາຍໄດ້ຕ່ຳທີ່ໄດ້ຮັບການຊ່ວຍເຫຼືອນັ້ນພັດທະນາເສດຖະກິດໄປສູ່ໄລຍະສູງກວ່າເກົ່າຢ່າງວ່ອງໄວ". ໂຄງການທີ່ຈີນຊ່ວຍເຫຼືອນັ້ນ ຈະເພີ່ມການລົງທຶນໂດຍກົງຂອງຕ່າງປະເທດຕໍ່ປະເທດທີ່ໄດ້ຮັບການຊ່ວຍເຫຼືອ, ຫຼຸດຜ່ອນຄວາມຜິດໂຕນກັນໃນດ້ານພື້ນຖານໂຄງລ່າງໃຫ້ໜ້ອຍລົງ, ກະຕຸ້ນການເຕີບໂຕຂອງເສດຖະກິດດິຈິຕອນ ແລະ ສ້າງຕ່ອງໂສ້ການສະໜອງ.
ປີ 2017 ຜ່ານມາ, ທ່ານ ໂຣດຣີໂກ ດູເຕີເຕ ປະທານາທິບໍດີຟິລິບປິນໄດ້ເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວໜຶ່ງເສັ້ນທາງ", ພ້ອມກັນນັ້ນ, ສາຍພົວພັນຟິລິບປິນ-ຈີນໄດ້ຂະຫຍາຍຕົວຢ່າງຟົດຟື້ນຄຶກຄັກຫຼັງຈາກທ່ານຂຶ້ນຮັບຕຳແໜ່ງປະທານາທິບໍດີໃນປີ 2016. ວັນທີ 10 ເມສາຜ່ານມາ, ທ່ານ ດູເຕີເຕ ໄດ້ຮັບຜົນງານຢ່າງຫຼວງຫຼາຍອີກເທື່ອໜຶ່ງໃນເວທີປຶກສາຫາລືອາຊີໂປອາວ ຄືໄດ້ເຊັນສັນຍາ 6 ສະບັບ ໂດຍໄດ້ຮັບການລົງທຶນຈາກວິສາຫະກິດຈີນໃນມູນຄ່າເກືອບ 10 ຕື້ໂດລາສະຫະລັດ.
 |
