ວັນທີ 21 ເມສານີ້ຕາມເວລາທ້ອງຖິ່ນ, ໂຄສົກຂອງທ່ານ ອານໂຕນີໂອ ກູເຕີຣິສ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການ ໂດຍໄດ້ສະແດງຄວາມຊົມເຊີຍຕໍ່ສປປ ເກົາຫຼີ ທີ່ໄດ້ປະກາດຈະຢຸດຕິການທົດລອງນິວເຄລຍແລະການທົດລອງຍິງລູກສອນໄຟນຳວິຖີຂ້າມທະວີບ.
ທ່ານ ກູເຕີຣິສ ຕີລາຄາໃນຖະແຫຼງການວ່າ, ການຕົກລົງຂອງ ສປປ ເກົາຫຼີ ດັ່ງກ່າວມີຜົນດີຕໍ່ການສ້າງຄວາມໄວ້ເນື້ອເຊື່ອໃຈກັນລະຫວ່າງບັນດາຝ່າຍທີ່ກ່ຽວຂ້ອງກັບບັນຫານິວເຄລຍຂອງແຫຼມເກົາຫຼີ,ມີຜົນດີຕໍ່ການບັນລຸຂະບວນການປອດນິວເຄລຍຂອງແຫຼມເກົາຫຼີໄລຍະຍາວດ້ວຍສັນຕິວິທີ. ທ່ານໄດ້ກ່າວຢ້ຳຄວາມຕັດສິນໃຈແລະການສະໜັບສະໜູນທີ່ເດັດດ່ຽວໜຽວແໜ້ນຂອງອົງການສະຫະປະຊາຊາດຕໍ່ການບັນລຸການປອດນິວເຄລຍຂອງແຫຼມເກົາຫຼີ.
ຖະແຫຼງການຂຽນວ່າ, ທ່ານ ກູເຕີຣິສ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ການເປີດໂທລະສັບສາຍດ່ວນລະຫວ່າງປະມຸກລັດ ສ.ເກົາຫຼີ - ສປປ ເກົາຫຼີ ໃນຫວ່າງມໍ່ໆນີ້ ພ້ອມທັງຫວັງວ່າມາດຕະການດັ່ງກ່າວຈະມີຜົນດີຕໍ່ການເພີ່ມຄວາມໄວ້ເນື້ອເຊື່ອໃຈກັນລະຫວ່າງສອງຝ່າຍຕື່ມອີກ ແລະ ຫຼຸດຄວາມຂັດແຍ້ງກັນລະຫວ່າງສອງຝ່າຍໃຫ້ໜ້ອຍລົງ.
 |
