ວັນທີ 23 ເມສານີ້,ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບບັນດາລັດຖະມົນຕີກະຊວງປ້ອງກັນປະເທດຂອງປະເທດສະມາຊິກອົງການຮ່ວມມືຊຽງໄຮ.
ທ່ານສີຈິ້ນຜິງກ່າວວ່າ: ກອງປະຊຸມລັດຖະມົນຕີປ້ອງກັນປະເທດຄັ້ງທຳອິດຂອງອົງການຮ່ວມມືຊຽງໄຮ້ຫຼັງຂະຫຍາຍປະເທດສະມາຊິກຈະຈັດຂຶ້ນໃນວັນທີ 24 ເມສານີ້,ເຊື່ອໝັ້ນວ່າ ພາຍໃຕ້ການສະໜັບສະໜູນແລະປະສານສົມທົບກັນຢ່າງຕັ້ງໜ້າຂອງບັນດາຝ່າຍ ແລະໃຊ້ໂອກາດກອງປະຊຸມລັດຖະມົນຕີປ້ອງກັນປະເທດເທື່ອນີ້ຈະເສີມຂະຫຍາຍເນື້ອໃນໃໝ່ແຫ່ງການພັດທະນາຂອງອົງການຮ່ວມມືຊຽງໄຮແລະ ສ້າງຄວາມມີຊີວິດຊີວາຫຼາຍຂຶ້ນ. ຈີນຈະກ້າວເດີນຕາມເສັ້ນທາງພັດທະນາໂດຍສັນຕິຢ່າງເດັດດ່ຽວໜຽວແໜ້ນ ແລະເປັນຜູ້ກໍ່ສ້າງສັນຕິພາບຂອງໂລກ, ຜູ້ປະກອບສ່ວນເຂົ້າໃນການພັດທະນາຂອງໂລກ ແລະເປັນຜູ້ຮັກສາລະບຽບສາກົນຢ່າງສະເໝີຕົ້ນສະເໝີປາຍ ທັງຍິນດີຮ່ວມກັບບັນດາປະເທດໃນໂລກຊຸກຍູ້ການສ້າງປະຊາຄົມຮ່ວມຊາຕາກຳມວນມະນຸດ.
ທ່ານເຊີເກ ຊອຍກູ ລັດຖະມົນຕີກະຊວງປ້ອງກັນປະເທດຣັດເຊຍໄດ້ຕາງໜ້າໃຫ້ລັດຖະມົນຕີກະຊວງປ້ອງກັນປະເທດຂອງປະເທດສະມາຊິກອົງການຮ່ວມມືຊຽງໄຮຢືນຢັນວ່າ ພວກຂ້າພະເຈົ້າຂໍສະແດງຄວາມເຄົາລົບນັບຖືຢ່າງສູງຕໍ່ຜົນສຳເລັດທີ່ຈີນຍາດມາໄດ້ໃນການພັດທະນາປະເທດແລະການກໍ່ສ້າງດ້ານການປ້ອງກັນຊາດ ແລະເຊື່ອໝັ້ນວ່າ ພາຍໃຕ້ການເອົາໃຈໃສ່ແລະຊີ້ນຳນຳພາຮ່ວມຂອງທ່ານປະທານສີຈິ້ນຜິງແລະປະມຸກລັດບັນດາປະເທດ, ການຮ່ວມມືດ້ານວຽກງານປ້ອງກັນຊາດຂອງອົງການຕົນຈະຂໍຖືເອົາໂອກາດກອງປະຊຸມລັດຖະມົນຕີປ້ອງກັນປະເທດຄັ້ງນີ້ໃນການພັດທະນາໃຫ້ເຖິງລະດັບໃໝ່ ເພື່ອເສີມຂະຫຍາຍບົດບາດສຳຄັນເຂົ້າໃນການຮັກສາຜົນປະໂຫຍດດ້ານຍຸດທະສາດຂອງບັນດາປະເທດລວມເຖິງການຮັກສາສັນຕິພາບແລະສະຖຽນລະພາບຂອງພາກພື້ນກໍຄືຂອງໂລກ.
