ມໍ່ໆມານີ້, ກະຊວງການຕ່າງປະເທດອາເມລິກາໄດ້ເຜີຍແຜ່ "ບົດລາຍງານສິດທິມະນຸດປະເທດຕ່າງໆປີ 2017" ເຊິ່ງໄດ້ຕຳໜິຕິຕຽນສະພາບການສິດທິມະນຸດຂອງຈີນອີກເທື່ອໜຶ່ງ. ຕໍ່ເລື່ອງນີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຖະແຫຼງຂ່າວໃນວັນທີ 23 ເມສານີ້ວ່າ: ຈີນໄດ້ຕໍ່ວ່າທັກທ້ວງຢ່າງເຄັ່ງຂຶມຕໍ່ອາເມລິກາແລ້ວ.
ທ່ານກ່າວຕື່ມວ່າ: ນັບແຕ່ວັນສ້າງຕັ້ງປະເທດສາທາລະນະລັດ ປະຊາຊົນຈີນເປັນຕົ້ນມາ, ໂດຍສະເພາະແມ່ນນັບແຕ່ການປະຕິຮູບ ແລະເປີດປະຕູສູ່ພາຍນອກໄລຍະ 40 ປີຜ່ານມາ, ພາລະກິດສິດທິມະນຸດຈີນໄດ້ຮັບໝາກຜົນອັນເປັນປະຫວັດສາດ, ປະຊາຊົນຈີນມີສິດອອກສຽງຫຼາຍທີ່ສຸດຕໍ່ເລື່ອງນີ້. ອາເມລິກາເປີດເຜີຍບົດລາຍງານຄືແບບນີ້ໃນແຕ່ລະປີ, ຕິຕຽນປະເທດອື່ນໆ ເຊິ່ງເຮັດໃຫ້ປະເທດສະມາຊິກຂອງປະຊາຄົມໂລກຫຼາຍປະເທດມີສຽງຄັດຄ້ານ. ເນື້ອໃນທີ່ກ່ຽວກັບປະເທດຈີນຂອງບົດລາຍງານປີນີ້ໄດ້ຄາດເຄື່ອນຈາກຄວາມຈິງ ແລະມີອະຄະຕິເຕັມປ່ຽມ. ຈີນໄດ້ຕໍ່ວ່າທັກທ້ວງຢ່າງເຄັ່ງຂຶມຕໍ່ອາເມລິກາ, ບອກໃຫ້ຝ່າຍອາເມລິກາຢ່າງຈະແຈ້ງວ່າ: ການແຊກແຊງວຽກງານພາຍໃນປະເທດຈີນ ແລະການສ້າງຜົນກະທົບຕໍ່ການພັດທະນາຂອງຈີນດ້ວຍວິທີແບບນີ້ ຈະເປັນພຽງຄວາມພະຍາຍາມທີ່ເສຍເປົ່າບໍ່ວ່າໃນອະດີດ ຫຼື ໃນອະນາຄົດ.
 |
