ສະຖານທູດຈີນປະຈຳອາຟການິສະຖານໄດ້ຈັດງານລ້ຽງຮັບຮອງ "ຈີນ-ອົງການສະຫະປະຊາຊາດ-ອາຟການິສະຖານ: ຮ່ວມກັນສ້າງປະຊາຄົມຮ່ວມຊາຕາກຳຂອງມວນມະນຸດ" ໃນວັນທີ 22 ເມສານີ້. ທ່ານຕະດະມິຈິ ຢະມະໂມະໂຕະ ຜູ້ຮັບຜິດຊອບຄະນະຊ່ວຍເຫຼືອອົງການສະຫະປະຊາຊາດປະຈຳອາຟການິສະຖານໄດ້ເຂົ້າຮ່ວມງານລ້ຽງ ແລະ ກ່າວວ່າ, ຈີນສົ່ງເສີມ ແລະ ຮ່ວມກັນສ້າງ "ໜຶ່ງແລວໜຶ່ງເສັ້ນທາງ" ແລະ ແລວເສດຖະກິດຈີນ-ປາກິສະຖານ ໂດຍສອດຄ່ອງກັບຄວາມປາຖະໜາຮ່ວມທີ່ຕ່າງຝ່າຍຕ່າງມີຜົນປະໂຫຍດຂອງບັນດາປະເທດໃນພາກພື້ນ ເຊິ່ງໄດ້ນຳເອົາໂອກາດສຳຄັນມາໃຫ້ການໄປມາຫາສູ່ທາງການຄ້າ, ການພັດທະນາທາງສັງຄົມຂອງອາຟການິສະຖານ ແລະ ພາກພື້ນນີ້.
ທ່ານກ່າວຕື່ມວ່າ, ອົງການສະຫະປະຊາຊາດ ແລະ ຈີນມີອະນາຄົດການຮ່ວມມືທີ່ກວ້າງຂວາງຢູ່ອາຟການິສະຖານ ເຊິ່ງມີເນື້ອໃນກ່ຽວພັນເຖິງການຊ່ວຍເຫຼືອມະນຸດສະທຳ, ການພັດທະນາຊັບພະຍາກອນມະນຸດ, ການກໍ່ສ້າງຄວາມສາມາດຂອງລັດຖະບານ, ປາບປາມຢາເສບຕິດ, ການຕ້ານລັດທິກໍ່ການຮ້າຍ, ການຫຼຸດຜ່ອນໄພພິບັດ ແລະ ອື່ນໆ. ອົງການສະຫະປະຊາຊາດຈະພະຍາຍາມຮ່ວມກັບຈີນ ເພື່ອປະກອບສ່ວນຫຼາຍກວ່າເກົ່າໃນວຽກງານການຮັກສາສະຖຽນລະພາບ ແລະ ສ້າງຄວາມຈະເລີນຮຸ່ງເຮືອງແກ່ອາຟການິສະຖານ ກໍຄືແກ່ພາກພື້ນ.
 |
