ໜັງສືພິມຫຼຽນເຫີຈາວປ້າວຂອງສິງກະໂປສະບັບວັນທີ 21 ເມສານີ້ລາຍງານວ່າ, ສະພາການຄ້າສິງກະໂປກຳແພງນະຄອນຊຽງໄຮໄດ້ຮ່ວມກັບວິສາຫະກິດ ແລະ ອົງການຈັດຕັ້ງ 6 ແຫ່ງ, ສ້າງສະຫະພັນປະດິດສ້າງໃໝ່ຈີນ-ສິງກະໂປ ເພື່ອຊ່ວຍວິສາຫະກິດສິງກະໂປ ແລະ ຈີນຊົມໃຊ້ຊັບພະຍາກອນຮ່ວມກັນ ແລະ ຮ່ວມມືກັນໃນຂົງເຂດປະດິດສ້າງໃໝ່ ແລະ ຂົງເຂດວິທະຍາສາດເຕັກໂນໂລຊີ.
ໃນໄລຍະເລີ່ມຕົ້ນ, ສະຫະພັນປະດິດສ້າງໃໝ່ຈີນ-ສິງກະໂປຈະດຳເນີນວຽກງານຕົ້ນຕໍຄືການຊ່ວຍວິສາຫະກິດກຳແພງນະຄອນຊຽງໄຮ ແລະ ສິງກະໂປ ໂດຍສະເພາະແມ່ນວິສາຫະກິດໃນຂົງເຂດປະດິດສ້າງໃໝ່ ແລະ ຂົງເຂດວິທະຍາສາດເຕັກໂນໂລຊີດຳເນີນການຢ້ຽມຢາມກັນ ແລະ ຊ່ວຍວິສາຫະກິດຊອກຮູ້ສະພາບການຕະຫຼາດຂອງກັນ. ໃນອະນາຄົດ, ສະຫະພັນຍັງຈະເປີດກວ້າງເຄືອຂ່າຍໄປເຖິງທົ່ວປະເທດຈີນ ແລະ ບັນດາປະເທດໃນອາຊີຕາເວັນອອກສຽງໃຕ້.
 |
