ວັນທີ 24 ເມສານີ້, ຢູ່ນະຄອນຫຼວງປັກກິ່ງ, ທ່ານຮວງຄຸນມິງ ກຳມະການກົມການເມືອງສູນກາງພັກ, ຫົວໜ້າຄະນະໂຄສະນາສູນກາງພັກກອມມູນິດຈີນໄດ້ພົບປະທ່ານນາງສູນທອນ ໄຊຍະຈັກ ກຳມະການສູນກາງ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ພ້ອມຄະນະ.
ທ່ານຮວງຄຸນມິງກ່າວວ່າ, ຈີນ ແລະ ລາວເປັນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ. ສະຫາຍເລຂາທິການໃຫຍ່ສີຈິ້ນຜິງ ແລະ ສະຫາຍເລຂາທິການໃຫຍ່ບຸນຍັງ ວໍລະຈິດໄດ້ເອົາໃຈໃສ່ຢ່າງສູງ ແລະ ນຳພາທາງຍຸດທະສາດ ໄດ້ຊີ້ແຈງທິດທາງ ແລະ ວາງແຜນໃຫ້ການຂະຫຍາຍການພົວພັນລະຫວ່າງສອງປະເທດໃນຍຸກໃໝ່. ຈີນຍິນດີພະຍາຍາມຮ່ວມກັບລາວ, ເພີ່ມທະວີການແລກປ່ຽນ ແລະ ຮ່ວມມືລະຫວ່າງສອງພັກ ແລະ ສອງລັດ ເພື່ອຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວຂະຫຍາຍກ້າວສູ່ລວງເລິກ.
ທ່ານນາງສູນທອນກ່າວວ່າ, ພາຍໃຕ້ການນຳພາອັນເຂັ້ມແຂງຂອງສູນກາງພັກກອມມູນິດຈີນ ທີ່ຖືສະຫາຍສີຈິ້ນຜິງເປັນແກນນຳ, ຈີນໄດ້ປະສົບຜົນສຳເລັດດ້ານການພັດທະນາທີ່ພົ້ນເດັ່ນ, ພັກປະຊາຊົນປະຕິວັດລາວຍິນດີສືບຕໍ່ຖອດຖອນບົດຮຽນດ້ານການກຳອຳນາດຂອງສູນກາງພັກກອມມູນິດຈີນ ແລະ ຊຸກຍູ້ການຮ່ວມມືຕົວຈິງໃນຂົງເຂດຕ່າງໆລະຫວ່າງສອງພັກ ແລະ ສອງລັດ.
 |
