ອົງການເກືອດຫ້າມອາວຸດເຄມີ ອອກຖະແຫຼງການໃນວັນທີ 25 ເມສານີ້ວ່າ ຄະນະກວດກາຂອງອົງການຕົນໄດ້ເຂົ້າໄປໃນເມືອງດູມາປະເທດຊີຣີ ທີ່ກ່າວຂານວ່າເກີດເຫດການຫຼອນໂຈມຕີດ້ວຍອາວຸດເຄມີນັ້ນອີກຄັ້ງໜຶ່ງ ເພື່ອກວດກາເຫດການດັ່ງກ່າວ.
ຖະແຫຼງການລະບຸວ່າ: ວັນທີ 25 ເມສານີ້, ຄະນະກວດກາໄດ້ເຂົ້າໄປໃນເມືອງດູມາອີກຄັ້ງແລະໄປກວດເບິ່ງຢູ່ສະຖານທີ່ໃໝ່ ຫຼັງໄດ້ເຂົ້າເມືອງດັ່ງກ່າວເພື່ອດຳເນີນການກວດກາເມື່ອວັນທີ 21 ເດືອນດຽວກັນ ແລະຄະນະກວດກາຈະສືບຕໍ່ດຳເນີນການກວດກາຢ່າງທ່ຽງທຳແລະອິດສະຫຼະ.
ວັນທີ 7 ເມສານີ້, ມີຂ່າວລາຍງານວ່າ ຢູ່ເມືອງດູມາ ເຂດກູຕາຕາເວັນອອກ ນະຄອນຫຼວງດາມັສ ປະເທດຊີຣີ ໄດ້ເກີດເຫດຫຼອນໂຈມຕີດ້ວຍອາວຸດເຄມີ. ລັດຖະບານຊີຣີເດັດດ່ຽວປະຕິເສດວ່າໄດ້ນຳໃຊ້ອາວຸດເຄມີ ແລະກ່າວວ່າ ຂ່າວກ່ຽວກັບເຫດການດັ່ງກ່າວ ແມ່ນຂ່າວລວງຂອງສື່ທີ່ໄດ້ຮັບການສະໜັບສະໜູນຈາກກຸ່ມປະກອບອາວຸດຕໍ່ຕ້ານລັດຖະບານ. ຈາກນັ້ນ, ກະຊວງການຕ່າງປະເທດຊີຣີ ກ່າວໃນວັນທີ 10 ເມສານີ້ວ່າ: ປະເທດຕົນໄດ້ເຊີນອົງການເກືອດຫ້າມອາວຸດເຄມີສົ່ງຄະນະກວດກາເຂົ້າໄປກວດກາຢູ່ເມືອງດູມາຢ່າງເປັນທາງການ.
