ໜັງສືພິມລຽນເຮີຈາວປ້າວຂອງສິງກະໂປລາຍງານວ່າ: ເລີ່ມແຕ່ວັນທີ 26 ເມສານີ້ເປັນຕົ້ນໄປ, ເກາະໂບຣາໄຊທີ່ເປັນແຫຼ່ງທ່ອງທ່ຽວທີ່ມີຊື່ສຽງຢູ່ພາກກາງປະເທດຟີລິບປິນຈະປິດບໍລິການເປັນເວລາເຄິ່ງປີເພື່ອດຳເນີນໂຄງການອະນຸລັກສິ່ງແວດລ້ອມແລະການປັບປຸງພື້ນຖານໂຄງລ່າງ, ໂຮງແຮມແລະແຫຼ່ງທ່ອງທ່ຽວຢູ່ເທິງເກາະໄດ້ຕັດຈຳນວນພະນັກງານໃຫ້ໜ້ອຍລົງຢ່າງຫຼວງຫຼາຍໃນ 1 ເດືອນປາຍຜ່ານມາ, ສົ່ງຜົນເຮັດໃຫ້ຫຼາຍຄົນບໍ່ມີວຽກເຮັດງານທຳແລ້ວ. ສື່ມວນຊົນລາຍງານວ່າ, ຄາດວ່າການປິດເກາະຈະກະທົບຕໍ່ຊີວິດການເປັນຢູ່ຂອງປະຊາຊົນເທິງເກາະຢ່າງໜ້ອຍ 73.500 ຄົນ.
ກະຊວງພາຍໃນແລະອົງການປົກຄອງທ້ອງຖິ່ນຂອງຟີລິບປິນກໍ່ຄືພາກສ່ວນປະຕິບັດກົດໝາຍໄດ້ຮ່ວມກັນວາງມາດຕະການປິດເກາະທີ່ເຂັ້ມງວດ,ໃນໄລຍະນີ້ຈະບໍ່ອະນຸຍາດໃຫ້ນັກທ່ອງທ່ຽວຂຶ້ນເກາະ,ມີແຕ່ປະຊາຊົນທ້ອງຖິ່ນແລະພະນັກງານທີ່ມີໃບອະນຸຍາດຈາກທາງການຈຶ່ງຈະສາມາດຄ້າງຢູ່ເທິງເກາະໄດ້. ພ້ອມກັນນັ້ນ, ໃນໄລຍະນີ້ຈະບໍ່ອະນຸຍາດໃຫ້ຜູ້ຄົນໃດໆລອຍນ້ຳຢູ່ແຄມຝັ່ງທະເລ.
 |
