ຣັດເຊຍຖະແຫຼງວ່າ ເຈົ້າໜ້າທີ່ອາເມລິກາເຂົ້າໄປໃນສະຖານກົງສຸນຣັດເຊຍທີ່ປິດແລ້ວນັ້ນເປັນການລະເມີດກົດໝາຍສາກົນ

ວັນທີ 26 ເມສານີ້, ທ່ານນາງມາເຣຍ ຈາຮາໂຣວາ ໂຄສົກກະຊວງການຕ່າງປະເທດຣັດເຊຍຢືນຢັນວ່າ ເຈົ້າໜ້າທີ່ອາເມລິກາເຂົ້າໄປໃນສະຖານກົງສຸນຣັດເຊຍປະຈຳຊີອັດໂຕເປັນການກະທຳລະເມີດກົດໝາຍແລະກົດລະບຽບສາກົນເປັນຕົ້ນ ສັນຍາວ່າດ້ວຍການພົວພັນທາງການທູດວຽນ, ສັນຍາວ່າດ້ວຍການພົວພັນທາງກົງສຸນວຽນແລະອື່ນໆ ເຊິ່ງເປັນເຫດທີ່ໜ້າໂກດຄຽດ. ນາງກ່າວວ່າ, ສະຖານກົງສຸນຣັດເຊຍປະຈຳຊີອັດໂຕເປັນຊັບສິນທາງການທູດຂອງຣັດເຊຍ, ມາຮອດປັດຈຸບັນ, ອາເມລິກາໄດ້ຍຶດສິ່ງກໍ່ສ້າງທາງການທູດຂອງຣັດເຊຍ 6 ແຫ່ງ ເຊິ່ງລວມທັງສິ່ງກໍ່ສ້າງທາງການທູດຣັດເຊຍທີ່ຖືກກວດປິດໃນປີຜ່ານມາ, ຣັດເຊຍຮຽກຮ້ອງໃຫ້ອາເມລິກາສົ່ງຄືນຊັບສິນເຫຼົ່ານີ້ຢ່າງເດັດຂາດ.

ວັນທີ 26 ມີນາຜ່ານມາ, ອາເມລິກາໄດ້ປະກາດຂັບໄລ່ເຈົ້າໜ້າທີ່ການທູດຣັດເຊຍ60ຄົນອອກຈາກປະເທດຕົນທັງຮຽກຮ້ອງໃຫ້ປິດສະຖານກົງສຸນຣັດເຊຍປະຈຳຊີອັດໂຕ ແລະສະຖານກົງສຸນນີ້ກໍໄດ້ປິດບໍລິການໃນວັນທີ 2 ເມສາຜ່ານມາຕາມຄຳຮຽກຮ້ອງຂອງອາເມລິກາ. ຂ່າວສານຣັດເຊຍລາຍງານວ່າ, ວັນທີ 25 ເມສານີ້, ເຈົ້າໜ້າທີ່ອາເມລິກາໄດ້ມ້າງລູກກະແຈແລ້ວເຂົ້າໄປໃນສະຖານກົງສຸນຣັດເຊຍປະຈຳຊີອັດໂຕທີ່ໄດ້ປິດແລ້ວ.