ທ່ານມູນເຈອິນ ປະທານາທິບໍດີ ສ.ເກົາຫຼີ ແລະ ທ່ານກິມເຈິງອຸນ ປະທານຄະນະກຳມະການແຫ່ງລັດ ສປປ ເກົາຫຼີໄດ້ພົບປະກັນຢູ່ປານມູນຈອມໃນວັນທີ 27 ເມສານີ້ ທັງລົງນາມໃນ "ຖະແຫຼງການປານມູນຈອມ" ໂດຍປະກາດວ່າ: ສອງຝ່າຍຈະພະຍາຍາມເພື່ອບັນລຸການປອດນິວເຄລຍຢູ່ແຫຼມເກົາຫຼີ ແລະ ການຫັນປ່ຽນກົນໄກຢຸດຕິສົງຄາມໃຫ້ເປັນກົນໄກສັນຕິພາບ.
ຖະແຫຼງການໄດ້ກຳນົດເປົ້າໝາຍຮ່ວມຂອງການປອດນິວເຄລຍຢູ່ແຫຼມເກົາຫຼີ ນອກນີ້, ສອງຝ່າຍຍັງປະກາດວ່າ: ຈະຕັ້ງໜ້າຊຸກຍູ້ການເຈລະຈາ 3 ຝ່າຍ ສ.ເກົາຫຼີ, ສປປ ເກົາຫຼີ ແລະ ອາເມລິກາ ຫຼື ການເຈລະຈາ 4 ຝ່າຍ ສ.ເກົາຫຼີ, ສປປ ເກົາຫຼີ, ອາເມລິກາ ແລະ ຈີນ ເພື່ອຫັນປ່ຽນສັນຍາຢຸດຕິສົງຄາມເກົາຫຼີໃຫ້ເປັນສັນຍາສັນຕິພາບ ແລະ ສ້າງກົນໄກສັນຕິພາບຖາວອນໜັກແໜ້ນພາຍໃນປີນີ້.
ຖະແຫຼງການໄດ້ສັນຍາໄວ້ວ່າ: ສ.ເກົາຫຼີ ແລະ ສປປ ເກົາຫຼີ ຈະຢຸດຕິ "ການເຄື່ອນໄຫວເປັນປໍລະປັກກັນ" ຢ່າງຮອບດ້ານ, ເພີ່ມທະວີການແລກປ່ຽນແລະຮ່ວມມື, ສ້າງຕັ້ງສຳນັກງານພົວພັນຮ່ວມເໜືອໃຕ້ຢູ່ແກຊົງ ທັງຈັດກິດຈະກຳຕ່າງໆ ເຊັ່ນ ໃຫ້ຍາດພີ່ນ້ອງຂອງຄອບຄົວທີ່ໄດ້ພັດພາກຈາກກັນມາແຕ່ດົນນານນັ້ນໄດ້ພົບພໍ້ກັນ. ນອກນີ້, ສອງຝ່າຍໄດ້ຫາລືແລະຕົກລົງກັນວ່າ ທ່ານມູນເຈອິນ ຈະເດີນທາງຢ້ຽມຢາມ ສປປ ເກົາຫຼີ ໃນລະດູໃບໄມ້ຫຼົ່ນປີນີ້.
