ຕາມຂ່າວCRI: ວັນທີ 27 ເມສານີ້, ທ່ານ ສີຈິ້ນຜິງ ປະທານປະເທດຈີນໄດ້ພົບປະບໍ່ເປັນທາງການກັບທ່ານ ນາເຣັນດຣາ ໂມດີ ນາຍົກລັດຖະມົນຕີອິນເດຍທີ່ມາຢ້ຽມຢາມຈີນຢູ່ນະຄອນອູຮ້ານແຂວງຮູເປີຍ ແລະໄດ້ຮ່ວມກັນເບິ່ງງານວາງສະແດງວັດຖຸບູຮານທີ່ດີເດັ່ນທີ່ຈັດຂຶ້ນຢູ່ຫໍພິພິທະພັນຂອງແຂວງຮູເປີຍ.
ທ່ານ ສີຈິ້ນຜິງ ໄດ້ສະແດງຄວາມຍິນດີຕ້ອນຮັບຕໍ່ທ່ານ ໂມດີ ຢ້ຽມຢາມນະຄອນອູຮ້ານ. ທ່ານຊີ້ວ່າ, ພວກຂ້າພະເຈົ້າຄວນກຳສະຖານະການການພົວພັນຈີນ-ອິນເດຍຈາກທາງຍຸດທະສາດ,ຮັບປະກັນການພົວພັນລະຫວ່າງສອງປະເທດໃຫ້ເດີນໄປຕາມທິດທີ່ຖືກຕ້ອງຢ່າງສະເໝີຕົ້ນສະເໝີປາຍພ້ອມທັງກ້າວໄປໜ້າ. ຈີນຍິນດີຮ່ວມກັບອິນເດຍສ້າງການພົວພັນຄູ່ຮ່ວມພັດທະນາທີ່ມີຄວາມແໜ້ນແຟ້ນກວ່າເກົ່າ,ຊຸກຍູ້ການແລກປ່ຽນແລະການຮ່ວມມືລະຫວ່າງສອງປະເທດໃນຂົງເຂດຕ່າງໆໃຫ້ກ້າວໜ້າຢ່າງຮອບດ້ານ.
ທ່ານ ໂມດີ ກ່າວດ້ວຍຄວາມຂອບໃຈຕໍ່ທ່ານ ສີຈິ້ນຜິງ ທີ່ເຊີນຕົນມາຈັດການພົບປະບໍ່ເປັນທາງການຢູ່ນະຄອນອູຮ້ານ ແລະກ່າວວ່າການພົບປະຄັ້ງນີ້ມີຄວາມໝາຍທາງດ້ານປະຫວັດສາດ. ການທີ່ອິນເດຍແລະຈີນຮັກສາການໄປມາຫາສູ່ແລະການຕິດຕໍ່ພົວພັນກັນລະຫວ່າງການນຳຂັ້ນສູງຂອງສອງປະເທດເລື້ອຍໆນັ້ນ ມີຜົນດີຕໍ່ການເພີ່ມທະວີຄວາມເຂົ້າໃຈເຊິ່ງກັນແລະກັນ,ລົງເລິກການຮ່ວມມື, ແລະສອດຄ່ອງກັບຜົນປະໂຫຍດຮ່ວມທີ່ບັນລຸການພັດທະນາແລະຄວາມຈະເລີນຮຸ່ງເຮືອງຂອງສອງປະເທດກໍ່ຄືພາກພື້ນນີ້.ອິນເດຍຍິນດີຮ່ວມກັບຈີນທຳຄວາມພະຍາຍາມເພື່ອເລື່ອງນີ້.
