ບົດລາຍງານສະບັບຫຼ້າສຸດຂອງລັດຖະບານລາວສະແດງໃຫ້ເຫັນວ່າ, ແຕ່ປີ 2002 ເປັນຕົ້ນມາ, ຢູ່ໃນທົ່ວປະເທດລາວໄດ້ສ້າງຕັ້ງເຂດເສດຖະກິດພິເສດ ແລະເຂດເສດຖະກິດສະເພາະທັງໝົດ 12 ແຫ່ງ, ໃນເວລາ 16 ປີຜ່ານມາ, ໄດ້ມີວິສາຫະກິດເອກະຊົນລົງທຶນທັງໝົດປະມານ 2 ຕື້ໂດລາສະຫະລັດ.
ບົດລາຍງານດັ່ງກ່າວຍັງກ່າວວ່າ, ນັບມາຮອດປະຈຸບັນ, ມີວິສາຫະກິດລາວ ແລະຕ່າງປະເທດ 377 ແຫ່ງໄດ້ລົງທຶນເຂົ້າໃນຂົງເຂດເຂດເສດຖະກິດພິເສດ ແລະເຂດເສດຖະກິດສະເພາະ, ກວມເນື້ອທີ່19612 ເຮັກຕາ, ລວມຍອດທຶນລົງທະບຽນບັນລຸ 8 ຕື້ໂດລາສະຫະລັດ, ໃນນັ້ນໄດ້ນຳໃຊ້ 1,8 ຕື້ໂດລາແລ້ວ.
ເຂດເສດຖະກິດພິເສດ ແລະເຂດເສດຖະກິດສະເພາະໄດ້ສ້າງລາຍຮັບເຂົ້າງົບປະມານເຖິງ 20 ລ້ານໂດລາ, ແລະສ້າງຕຳແໜ່ງວຽກເຮັດງານທຳໃຫ້ແກ່ຄົນລາວ ແລະຄົນຕ່າງປະເທດເຖິງ 20 000ກວ່າຕຳແໜ່ງ, ໃນນັ້ນມີຄົນລາວ 9000 ກວ່າຄົນ.
ໃນຫຼາຍປີຜ່ານມາ, ລັດຖະບານລາວໄດ້ປັບປຸງການຄຸ້ມຄອງເຂດເສດຖະກິດພິເສດ ແລະເຂດເສດຖະກິດສະເພາະ, ພັດທະນາຊັບພະຍາກອນມະນຸດ ເພື່ອດຶງດູດທຶນເອກະຊົນຈາກລາວ ແລະຕ່າງປະເທດ, ສ້າງໂອກາດປະກອບອາຊີບຫຼາຍກວ່າເກົ່າພາຍໃນປະເທດ, ທັງຊຸກຍູ້ການພັດທະນາຂອງເສດຖະກິດສັງຄົມ.
ໃນດ້ານທ່າແຮງທີ່ດຶງດູດການລົງທຶນ, ນອກຈາກຊັບພະຍາກອນທຳມະຊາດແລ້ວ,ປະເທດລາວຍັງມີທ່າແຮງດ້ານພູມສາດທີ່ຕັ້ງຢູ່ໃຈກາງຂອງອະນຸພາກພື້ນ, ຕົ້ນທຶນຄ່າແຮງງານຕ່ຳ, ແລະມີນະໂຍບາຍພິເສດດ້ານພາສີ(ຫຼື GSP)ຈາກ 50 ກວ່າປະເທດ.
 |
